Home Gobierno Un meta importante ta pa Hulanda tuma over e debenan di futuro...

Un meta importante ta pa Hulanda tuma over e debenan di futuro y cu Aruba por sigui presta na 0%

442
0
SHARE
- Advertisement -

Prome Minister Wever Croes:

ORANJESTAD (AAN): Dialuna mainta Prome Minister Evelyn Wever Croes a tene un conferencia di prensa, pa papia riba su viahe na Hulanda.

E mandatario a cuminza na bisa cu el a bin bek hopi cansa pero hopi satisfecho.

“Satisfecho den sentido cu nos a logra dos cos importante te ainda, esta e documentonan cu siman pasa nos a haya a bira publico y cu nos a haya espacio pa negocia y purba yega na otro, pa weita si nos por tin un consensus riba e condicionnan”.

Nos no a acepta e condicionnan manera nan tabata y nos a splica cu esey no tabata posibel, door di e forma con tur cos a bay, segun e Prome Minister.

El a sigui bisa cu e proposicion ta pa nos tin un Consensus Rijkswet y esey no ta e caso ainda.

“Nos a haya un documento di ‘take it or leave it y esey a keda asina te cu mi a viaha”.

Den e ley cu tin riba papel awor, bo por destila cierto punto cu ta mustra cu e entidad aki cu nan kier crea, por bay sinta riba e stoel di Gobierno.

E punto principal cu a habri caminda pa nos por a yega na sigui papia, ta e hecho cu Aruba den e caso aki ta cana un trayecto diferente cu Corsow y St. Maarten, den sentido cu Aruba a cumpli cu tur condicion cu a wordo poni prome cu esaki, pa por yega na remarke pa e fondonan, segun Wever Croes.

E mandatario a sigui bisa cu e negociacionnan cu Secretario di Estado Raymond Knops y minister di Finanzas Wopke Hoekstra a bay bon y cu nan ta insisti cu nan kier yuda Aruba.

Segun Prome Minister, tin diferente aspecto riba mesa.

Uno ta trata e supervision di Aruba.

Aruba tin supervision di CAft y esey ta basa riba un ley di Aruba mes (landsverordening).

“Hulanda a bisa cu prome cu COVID-19 nan no tabata presta Aruba placa, esta cu Aruba tabata presta riba mercado internacional”.

Aworaki den COVID-19 nos a presta caba 200 miyon florin y aworaki nos ta pidiendo pa nos haya 200 miyon florin mas, mientras cu prome cu fin di aña indudablemente ta bay bin un 100 miyon florin mas, pues nos ta papiando aki di mas cu 500 miyon florin di prestamo.

Pa esaki nan kier mas supervision y sinceramente bo no por tuma nan na malo, segun Wever Croes.

El a sigui bisa cu unda na mundo cu Aruba lo a bay pa pidi un prestamo, nan lo a exigi cierto garantia y condicion.

“Tanten cu e condicion ta supervision nos ta compronde,  nos por biba cune y nos ta papiando riba dje, pero pone Aruba bao di e Rijkswet Financieel Toezicht no ta funciona, pasobra tecnicamente pa motibonan financiero esey lo a kibra nos economia”.

Nan a realiza esey, nan a admiti esey y aworaki nos ta papiando di un otro forma pa duna nan e extra supervision cu tanto nan ta desea, pero cu bo no por djis pone Aruba den e Rijkswet Financieel Toezicht, segun e mandatario.

El a indica cu e meta di Aruba ta pa yega na un palabracion cu Hulanda pa nan tuma over e debenan di futuro y cu Aruba por sigui presta na 0%.

“Aruba e aña aki ta suppose di a paga 230 miyon florin na interes door cu nos debe ta hopi halto”.

Bo por imaginabo si nos no tin nodo di paga full e suma aki of parti di dje mas?.

E ora ey bo ta cuminza garantiza cu generacionnan di futuro por tin presupuestonan cu no tin deficit grandi mas, segun Wever Croes.

- Advertisement -

DUNA COMENTARIO

Please enter your comment!
Please enter your name here