Home Editorial Un etapa nobo den recuperacion di futuro

Un etapa nobo den recuperacion di futuro

121
0
SHARE
- Advertisement -

Ya mita di 2020 a keda atras. Historia lo relata con diripiente mundo a wordo presenta cu un enemigo invisibel, e coronavirus nobo cu den corto tempo a cambia henter mundo.

Mundo a enfrenta un caos, marca pa incertidumbre y panico enfrente e peliger mortal di un virus.

Economia mundial a wordo destrui y Aruba mester a cera produccion di su economia basa riba turismo pero tambe tur porta pa e isla cu mester di importacion y conexion cu resto di mundo pa sobrevivi como isla chikito.

Gobierno Evelyn Wever-Croes mester a maneha Aruba den e momentonan mas pisa cu historia moderno di e pais a produci. No tabata facil y mester aplaudi e trankilidad y e liderazgo cu Prome Ministro Wever-Croes a ofrece na Aruba na 2020.

E siman aki, un etapa nobo ta habri. Aruba ta bay conoce e periodo den cual mester recupera e sector economico cu ta productor di trabou, entrada y bienestar di e comunidad.

Aruba y henter mundo a siña un les masha grandi. E balor di comercio y di trabou pa e pais funciona, a wordo confirma.

Na momento cu comercio a wordo paralisa dor di e coronavirus nobo, e pais a perde su entrada y trahadonan a perde nan pan cu ta importante pa e circulo economico funciona na un pais liber.

A keda demostra cu na un pais democratico, sector priva ta e generado di actividad economico cu ta sostene un bon nivel social.

E siman nobo ta entrega na Aruba exigencianan grandi. Mester recupera e economia y mester habri porta pa turista y tur ramo di economia.

E no ta facil pasobra un gran parti di turista tin miedo di bandona nan pais na e momento aki. Aruba tin e deber di demostra cu na Aruba e turista ta topa cu un pueblo, cu ta evita pa tanto e poblacion local como e bishitante wordo contagia cu Covid-19.

For di momento cu e bishitantenan dicidi cu nan ta bini Aruba, nan mester sinti cu nan ta bandona e mundo di tension cu nan a conoce na nan pais for di momento cu e enfermedad a presenta su mes.

Si e exigencianan pa nan drenta Aruba y e areglonan local pa nan estadia ta duna e impresion di responsabilidad gubernamental cu a prepara pa cualkier eventualidad di enfermedad, nan grado di tension ya a baha.

Mescos cu e Arubiano, e turista conoce e peliger di Covid-19 y ta scoge pa Aruba pa motibo di e reputacion cu Aruba tin como destinacion stabiel.

Yegada di turista ta nifica cu e siman aki tambe mester mira con ta soluciona conflictonan cu por tin, pa e turista cu ta huy protesta internacional, no wordo confronta cu manifestacion cu ta kibra su trankilidad mas cu nunca.

Comercio mester wordo prepara pa e yegada di e turista. Trahadonan mester tene nan mes na reglanan pa evita cu e virus por plama.

Taxistanan, restaurantnan, hotelnan, negoshinan mester duna lo miho di nan mes mescos cu publico cu mester mantene distancia y mester proteha nan mes y e turista.

DIARIO den curso di e siman aki, lo sigui atende tur loke ta necesario pa bolbe saluda e turista pero tambe expertonan cu mester bin sostene entre otro nos sistema comercial basico cu nan conocemento y sigur e sector di servicio.

Famianan lo haya oportunidad di reuni. E etapa di isolacion total a termina. Awor recuperacion di economia ta nos prioridad pa tin entrada pa tur Arubiano, tur sector y como base pa bienestar general.

- Advertisement -

DUNA COMENTARIO

Please enter your comment!
Please enter your name here