Home Enseñanza Tur mucha tin derecho di haya enseñanza cu ta pas cu nan...

Tur mucha tin derecho di haya enseñanza cu ta pas cu nan talentonan

38
0
SHARE
- Advertisement -

Minister Lampe:

ORANJESTAD(AAN): La Nueva Escuela Virtual ta un proyecto cu minister di Enseñanza Rudy Lampe ta bay bin cune, pa yuda e yiunan di migrante haya un mihor educacion.

Hopi biaha tin muchanan cu ta inteligente suficiente pa logra haya un bon educacion na Aruba, pero e problema grandi cu nan tin ta cu door cu nan ta por ehempel Latino y tin problema grandi cu Hulandes, nan tin cu pasa den un trayecto mas largo y dificil pa nan.

Minister Lampe durante un conferencia di prensa Dialuna a splica cu muchanan local mes sa pasa den problemanan similar, door di fayonan cu tin den e sistema di enseñanza na Aruba.

El a duna un ehempel di un hoben cu e tin contacto cune cu awor na edad di 25 ta cuminza e opleiding di Hoge School na Hulanda via un Aruba Lening.

E mandatario a splica cu e hoben aki a cuminza na Emma School despues di cual el a bay FPO.

El a sigui pa EPB y subi di nivel na EPB, despues di cual el a bay EPI.

“Awor cu e tin 25 aña e por cuminza studia e profesion cu semper el a desea di studia”.

Si tabata tin e sistema aki di K12 pa e mucha aki, cu su 18 aña ya e lo a bay Hulanda pa studia.

Esaki segun Lampe, kende a splica cu e problema ta cu e mucha no a haci ningun test di IQ y nan a djis mande Emma School, door cu e tabata tin problema cu Hulandes.

Awor pa colmo e ta haci un opleiding na Hulanda na Ingles.

“Wak cuanto aña a perhudica e hoben local aki”, segun e minister, kende a splica cu asina tin mas caso di hendenan cu e conoce, cu door di problema di idioma ta cay atras, siendo cu nan tin un inteligencia suficiente halto pa por yega leu”.

“Nos sistema a faya e hoben aki, pues no solamente e ta perhudica migrantenan, sino nos muchanan local tambe”.

Hopi biaha en bez di habri oportunidad pa nos muchanan, nos ta cera esaki, segun e mandatario.

El a splica cu tur mucha tin derecho di enseñanza cu ta pas cu nan talento, tambe e muchanan migrante.

Segun e minister e proyecto di La Nueva Escuela Virtual cu ta bay start na Augustus si ta bay ofrece mihor posibilidad pa e muchanan migrante.

 

 

 

- Advertisement -

DUNA COMENTARIO

Please enter your comment!
Please enter your name here