Trias politica den Reino Hulandes na peliger

    1066
    0
    SHARE
    - Advertisement -

    Segun expertonan legal pakete Hulandes ta sistema di eleccion

    *Pueblo lo  no por vota pa entidad gubernamental poderoso nobo

    *Cooperacion di Parlamento ta bira decisivo pa Aruba haya mas placa 

    ORANJESTAD (AAN): “Tur cos ta depende di e negociacion cu ta tuma luga actualmente na Hulanda entre Aruba y Reino. Den e negociacionnan aki mester bini na cla, kico lo bira e futuro di e trias politca di Aruba y si ta acepta pa Aruba haya un entidad gubernamental nobo di cual e miembronan no ta wordo eligi directamente of indirectamente door di eleccion.”

    Esaki ta declaracion di expertonan cu kende DIARIO for di Diabierna na momento cu e proposicionnan Hulandes pa asistencia financiero a bira conoci, ta den consulta.

    Durante e reunionnan na Hulanda, puntonan clave di e actitud di DIARIO riba e nivel di gobernacion cu Aruba a conoce durante ultimo decadanan, a resalta.

    Cu por a spera un actitud severo di parti di Hulanda na momento cu Aruba tabata tin necesidad pa asistencia extra debi na e coronavirus nobo, tabata algo pa cual DIARIO a adverti prome cu Hulanda na Mei ultimo a cuminsa duna cierto indicacionnan.

    Den consulta cu expertonan legal y constitucional, DIARIO a atende asuntonan sumamente serio cu tin den e proposicion Hulandes cu ta pidi pa Aruba bay di acuerdo cu e introduccion di un organo cu lo tin e nomber di Caribische Hervormingsidentiteit (Identidad di Reforma Caribense) cu mester duna direccion na e futuro di e islanan.

    E prome punto cu expertonan ta trece dilanti ta, cu aki ta trata di un organo gubernamental cu ta wordo introduci manera e documentonan mas ta mustra. Ora ta papia di organonan gubernamental den e sistema constitucional di Aruba ta papia di organonan cu ta directamente mara na e Trias Politico di Aruba, cu ta resultado di eleccionnan na Aruba na forma directo of indirecto.

    Esaki ta nifica cu pa medio di eleccion pueblo di Aruba ta vota pa Parlamento, cu ta nombra miembronan di Conseho di Ministro y tambe leynan cu mester wordo carga y proteha dor di Husticia.

    Expertonan ta puntra nan mes con ta acomoda un entidad nobo den gobernacion di Aruba y kico e resultado lo ta pa un gobierno democratico cu ta nifica cu ta pa medio di eleccion ta nombra gobernantenan cu mester representa pueblo di Aruba.

    Segun e expertonan, Gobierno di Reino ta e prome instancia cu mester respeta e orden di ley den cual democracia ta hancra.

    Pa introduci e entidad nobo cu e tarea cu kier duna e entidad aki, Aruba mester deshaci di su Trias Politica cu ta wordo someti na decision di e entidad, cu ta wordo nombra dor di Reino y ta wordo forma dor di expertonan cu por ta di cualkier parti di Reino.

    Esaki sinembargo no ta reemplasa e base di e sistema democratico cu Aruba conoce cu tin un separacion di poder, cu awor ta wordo centralisa den e entidad cu cual Parlamento mester coopera di un forma cu e entidad of Reino ta acepta, pa asina Aruba haya mas asistencia financiero den futuro.

    Segun informantenan e asunto aki ta sumamente delicado y mester haya atencion debido di tur parti den Reino ya cu e tin resultado serio pa e forma con constitucion ta exigi pa e pais wordo goberna te awor.

    Pues no ta trata aki di un supervision si Aruba ta wordo bon goberna a base di e maneho cu ta wordo hiba, pero ta trata aki di un organo cu hasta por introduci su propio iniciativanan y trece cambio grandi cu e ta considera necesario den gobernacion di Aruba.

    DIARIO lo sigui informa Aruba di e desaroyonan cu asistencia di expertonan riba tur tereno y na tur pais.

     

     

     

    - Advertisement -

    DUNA COMENTARIO

    Please enter your comment!
    Please enter your name here