Home Policial Tragedia den Nightclub cu saldo di 2 morto y 2 dama hoben...

Tragedia den Nightclub cu saldo di 2 morto y 2 dama hoben luchando pa nan bida

2161
0
SHARE
- Advertisement -

ORANJESTAD (AAN): E establecimento Latin Passions cu ta situa den Caya Captain Robert Rodgers 37 na San Nicolas, ta situa net mey-mey di AMC Unicon y Caracas Bar. 

   Pa un motibo of otro, e cobranzanan atraza di coriente a pone cu e compania NV Elmar a desconecta suministro di electricidad y e lugar a keda pa algun tempo den scuridad.  Tanto e doño di e lugar y e bartender a palabra cu otro cu ora nan acumula suficiente placa, lo bay paga e cuenta di coriente pa asina e wordo reconecta bek.

   Sinembargo ta parce cu e Bartender a dicidi pa trece un Generator den e negoshi.  E wayanan di coriente di e delco a wordo manda pa e fusebox, unda a ‘jump’ e conexion for di NV Elmar pa asina e negoshi por a haya coriente bek.  Riba Social Media, e Bartender a cuminza promove cu e negoshi a habri bek for di 4:00 pm te cu 11:00 pm.

   DOS AMIGA:

   Riba e anochi di Diamars, dos amiga esta Joslyn y tambe Jessica a dicidi na sali bay trip cu e Nissan March color berde scur di Jessica.  Asina nan dos a yega na e Bar, a staciona e auto net dilanti Caracas Bar, y a bay paden.

   E momento ey tabatin e Bartender Tio Lopez como tambe 3 dama den e negoshi.  Ningun hende mas a drenta, pues e porta no a habri mas.  Sinembargo e delco si tabata trahando constante, y for di su muffler tabata sali un gas hopi venenoso, toxico, y cu no tin color y no ta hole na nada.

   Ta trata aki di Carbon Monoxido, conoci den quimica como ‘CO’.  E ta diferente cu e Carbon Dioxido (CO2) cu bo ta haya den refresco.

   E personanan aki tabata hala rosea normal, y no ta ripara cu e concentracion di Carbon Monoxido ta hopi halto.  Sin cu nan sa, nan curpa a cuminza cambia. 

   Nan a cuminza haya dolor di cabez, nan curpa ta bira debil, nan a sinti posiblemente mareo, kizas barica ta cuminza haci raro, bo por saca tambe, sigui pa señal cu bo ta keda tur zonza, bo no por ni cana drechi, y dolor ta dal bo na pecho.  E sintomanan aki tin biaha ta hasta parecido na griep.

Si bo inhala hopi CO, diripiente bo por manera haya soño diripiente y bo ta bay for di tino.  Of den cierto caso, bo ta haya algun atake, bo curpa por tembla y zwaai pa loco y aki bo por hasta dal bo curpa y keda cu golpi.  Lo mas peor ta cu si bo tin pulmon cu cierto condicion, bo no por inhala suficiente oxigeno mas y hopi biaha hendenan ta bay den coma, y de lo extremo tin cu ta muri tambe.

   Kizas for di Diaranson di 2:00 am caba, e cuatro personanan aki den Latin Passions a bay for di tino, sin cu ningun hende sa kico a pasa eyden.  Portanan ta cera, y e delco a traha te ora cu combustible a caba y a stop.

   Ni Diaranson mainta, ni merdia, y tampoco Diaranson atardi no tabatin hende cu a bay Latin Passions.  E lugar ta cera y ningun hende sa cu paden tin 4 persona benta abao

   FAMIA PREOCUPA:

   Mientras tanto riba Diaranson, tanto famianan di Joslyn y tambe Jessica a cuminza bira preocupa.  Pasobra nan no a yega cas bek.  Esaki ta algo cu nunca e personanan aki ta haci, pues esaki a haci famia bira intrankil.

   Hasta nan a acudi na Polis pa raporta perdida di e dos amiganan aki.  E tata di Joslyn riba su mes a dicidi na cuminza core rond pa check si e por localiza nan. 

   E tata di Joslyn a pasa den Caya Captain Robert Rodgers (ex-Grensweg) y a topa cu e Nissan March di e amiga Jessica.  Pero e negoshinan tur ta cera, pues e no a pensa nada malo.

   DOÑO A YEGA:

  Un poco mas cu 20 ora despues, esta te Diaranson anochi pa 11’or, e propietario di inicial M.M. di e negoshi a yega.  El a haya e lugar cera, pues a usa su yabi pa bay paden.

   Loke el a topa ta algo espantoso!  El a haya e bartender Tio Lopez benta abao riba piso, el a haya e dama Mia Figaroa patras di bar, a haya un di e

damanan hoben benta riba un sofa, y e otro amiga abao riba piso.

   Segun Vocero Policial Liliana Rasmijn, tabata 11:10 pm cu yamada a drenta na Alarm Centrale 911 cu tin mester di auxilio urgente di Polis y Ambulans na Latin Passions como cu tin 4 hende benta abao for di tino.

Polis mesora a wordo manda na e lugar, y e prome unidad cu a yega a solicita pa yudanza mas rapido di Ambulans.  Alarm Centrale a manda un unidad di Bombero, y tambe unidad di First Responder na e lugar.

   LUGAR TA FULL SCUR:

   E prome oficialnan cu a yega, a nota cu e lugar ta full scur.  No tin coriente, pero tin un sorto di gas fuerte presente den e lugar, y pesey nan a actua rapido paden.  A ripara cu tin 2 dama hoben cu ainda ta halando rosea cu problema, y a dicidi na carga nan y bay pafo pa nan cuminza haya aire fresco.  Uno di nan tabata full for di tino, mientras e otro dama tabata actua confuso y no sa kico ta pasando.

   Paramediconan mesora a logra stabiliza e dos damanan aki lo mas cu nan por, a aplica oxigeno mesora, y cu urgencia a sali rumbo pa Dr. Horacio Oduber Hospital pa cuminza e proceso di detox nan di e gas Carbon Monoxido.

Si un persona a inhala hopi CO, esaki lo por hinke den un coma profundo y prolonga.  Si acaso e cerebro a keda hopi largo sin haya oxigeno (hypoxia), e por causa efectonan neurologico cu por resulta den daño na cerebro, of tambe daño na bo curazon, esta e parti cardiaco.

   Un pashent cu inhala demasiado Carbon Monixido, lo dura como 5 ora di respiracion di oxigeno puro pa saca mitar di e CO di bo curpa.  Despues lo dura un otro 5 ora pa saca mitar di e resto di CO for di bo curpa, etc.

   Mientras tanto, unidadnan di Recherche, personal di oficialnan forensico di BFTO, varios halto funcionario di Polis, incluyendo Halto Comisario Vanessa Kock a presenta, como tambe Fiscal.  A haci un investigacion completo paden, sacando potret di e dos curpanan y tambe a tuma potret di e konkelmento na e fuse-box, a check e forma cu a pone e generator eyden, y tuma extra detaye den e Bar scur ey.

  VICTIMANAN:

   Pa exactamente 1:30 am, Dr Texier a constata morto di señora Maria d.L. Figaroa mihor conoci como ‘Mia’, naci na Aruba dia 23 di April 1973, pues tin 47 aña di edad.

   Tambe a constata morto di Gabrielito Roberto Lopez mihor conoci como ‘Tio’, naci na Aruba dia 9 di December 1977 pues tin 42 aña di edad.

   Vocero di Polis, Liliana Rasmijn a confirma pa DIARIO, cu Fiscal a duna ordo pa tur dos curpa wordo confisca pa investigacion.

   E dos victimanan cu a wordo transporta pa Hospital na bida, a wordo identifica como Joslyn van der Linden mihor conoci como ‘Popps’ di 23 aña di edad, y tambe Jessica Sousa di 31 aña.

   Autoridad a keda na e lugar pa como 4 ora pa investiga, y na final ta personal di Ad Patres Funeral Home a transporta restonan mortal pa Mortuarium.  Personal di Slachtofferhulp tambe tabata na e lugar pa sostene famianan cu tabata inconsolable.  Personal di DTI a cuminza cu un investigacion tambe riba loke a pasa.

   Na famianan di e fayecidonan, DIARIO ta extende su mas profundo palabranan di condolencia.  Tambe ta desea pronto recuperacion na e dos victimanan.

- Advertisement -

DUNA COMENTARIO

Please enter your comment!
Please enter your name here