Home Turismo Ta stipula diferente scenario pa cada un di e posibel situacionnan relaciona...

Ta stipula diferente scenario pa cada un di e posibel situacionnan relaciona cu Covid-19

32
0
SHARE
- Advertisement -

CEO di ATA relaciona cu risiconan ora di habri frontera:

ORANJESTAD (AAN): Ronella Tjin Asjoe-Croes, CEO di Aruba Tourism Authority (ATA) a elabora durante e conferencia di prensa di gobierno diaranson anochi kico ATA ta haciendo como tambe Aviacion Civil y DVG, entre otro manera specialistanan Infectologo pa asina por tuma e mihor decision posibel si mester escala e medidanan pa loke ta reapertura di frontera cu Merca.

Tin diferente aspecto cu ta wordo evalua, a bisa. Pa tur situacion tin scenarionan y no ta solamente vigente pa e caso di Merca, pero tambe pa Europa of pa Latinoamerica, Canada, etc.

E modelo cu nan ta aplica ta cu ta stipula diferente scenario pa cada un di e posibel situacionnan. Ora cu un pais ta mustra cu e ta escalando den risico y ta un pais di unda ta sperando bishitantenan, por conta cu tin diferente opcion cu ta wordo evalua.

E opcionnan ta basa riba diferente analisis. DVG ta evalua e risico y ta indica a base di e cantidad di bishitante cu ta espera kico lo ta e posibel casonan positivo cu lo por ta importando, cuanto lo rekeri tratamento den ICU, cu lo wordo hospitalisa, pero tambe e casonan cu no ta severo, pero cu mester di isolacion y acomodacion.

Esaki ta locual ta haciendo aworaki atrobe pa areanan cu ta mustra di ta posibel risico for di e pais di Merca, e CEO di ATA a indica.

For di Merca, a bisa, no mester pensa cu ta e pais den su totalidad so. Ta haci e analisis aki separa pa Florida, New York, California, etc. Esey ta pa duna un impresion di kico ta e analisis cu ta tumando lugar aworaki, a base continuo.

E resultadonan cu ta mirando ta rekeri cu tin cu bay eleva e analisisnan tambe pa asina por tuma decision. Esaki kiermen cu ya caba a discuti e diferente pasonan cu lo por tuma. Si dicidi cu ta escala e medidanan, por ehempel pa Florida, por dicidi cu ta cera e mercado aki pa ingreso pa Aruba of ta exigi un resultado kisas negativo prome cu e viahe.

Cada decision asina tin su implicacionnan y esakinan ta wordo discuti tambe cu e stakeholders y socionan aereo, Tjin Asjoe-Croes a remarca.

Ta monitor y ta inclui como parti di nan evaluacion tambe e consumidor y su posibel reaccion.

Banda di esaki ta indica tambe kico lo ta e posibel impacto den cantidad di bishitante cu lo por ta ricibiendo si ta bin cu medida y kico kiermen cu ta ricibi menos bishitante for di Merca, por ehempel y kico e impacto economico lo ta.

Aruba a fiha e fecha di 10 di Juli pa haci reapertura di frontera cu Merca. E bon ta cu ya caba e otronan a habri caba den Caribe pa e mercado mericano, permitiendo Aruba wak con ta bayendo eynan y tuma nota di kico ta e pasonan cu nan mes ta tumando.

Tur cos ta bay conforme e capacidad cu tin na Aruba, entre otro ICU, Hospital, acomodacionnan pa isolacion, entre otro.

Ta monitoria tambe kico e mercadonan mes cu ta pasando den e situacion fastioso di e virus aki ta haciendo.

Pa loke ta Florida, ta pendiente di e anuncionan con nan ta bay mitiga e situacion. New York mes a dicidi cu nan no ta permiti bishitante di cierto estadonan of ciudadnan den Merca sin cu nan mester bay den cuarentena ora nan yega.

California a tuma e decision cu nan ta escala atrobe nan medidanan y a cera barnan, y a tuma otro medidanan adicional, Ronella Tjin Asjoe-Croes a duna di conoce. Tur esaki ta wordo tuma den consideracion den e analisis cu ta wordo haci aki na Aruba.

    

 

 

- Advertisement -

DUNA COMENTARIO

Please enter your comment!
Please enter your name here