Home Comercio Setar a ripara cu hendenan a stop di haci yamada

Setar a ripara cu hendenan a stop di haci yamada

93
0
SHARE
- Advertisement -

Mas hende riba Internet

ORANJESTAD (AAN): Tabata Diamars mainta cu Setar NV a lanza nan productonan nobo di Setar IPTV, como tambe servicio di Wireless Mesh pa tur hende tin un cas full cubri pa señal di WiFi.

   Director di e compania, Roland Croes, riba pregunta di prensa a confirma cu Setar NV awor na 2020 a ripara cu hendenan a stop di haci yamada via telefon normal.

   Segun Croes, esey tambe tin su consecuencianan.  Pasobra awor e uso di Internet, principalmente internet di cas a subi.  Hopi hende awor ta riba WiFi, y esaki na su turno ta trece cierto dificultad pa algun hogar.  Esey no ta djis na Aruba, sino rond mundo.

   Como ehemplo, si acaso tur cas den un bario tin WiFi, e chens ta grandi cu e habitantenan aki no sa con pa setup e WiFi adecuadamente.  Tin chens cu e routernan aki ta usando mesun frecuencia, y e ora na e casnan aki lo bo haya congestion, y problema pa mantene un bon señal.  Pues Internet ta cada rato cay afo.  Esey ta algo cu e compania Setar mester a deal cune na varios ocasion.

   E Director di Setar NV a mustra, cu pesey e compania local a dedica hopi tempo pa bin cu un sistema nobo di WiFi, cu den nan bista lo bay deal mihor cu e congestion cu bo ta haya na e casnan, y riba e red tambe di internet.

   E ta un proyecto total cu nan ta inverti basta placa y tempo den dje, pero ta automatizando esaki pa asina por deal cu e crecimento di trafico.

   Trafico di internet a cambia tambe mas awor, unda hendenan ta stream video bastante.

   Pues di berdad, ya no tin hopi combersacion mas via telefon, y nan como compania a nota cu e uso di telefon pa papia a baha drasticamente.

   Pero di otro banda, e crisis di e Coronavirus nobo a hasta acelera e proceso ey.  Awendia mas hende ta prefera di un message, kizas manda voicenote, of videocall, como tambe Zoom-Meetings pa combersacion di 4 hende of mas.

   Nan ta papia si, pero den otro forma y no na telefon.  Combersacionnan ta bay via internet.  Segun Croes, esey lo ta un cambio cu lo no regresa back rapido mas.  El a cambia full e proceso.

 

- Advertisement -

DUNA COMENTARIO

Please enter your comment!
Please enter your name here