Referendum mester duna mandato pa kibra autonomia

    759
    0
    SHARE
    - Advertisement -

    Carta abierta di e matutino di Aruba na Mark Rutte y Raymond Knops

    *Cifranan Hulandes y Europeo ta prueba di loke Covid-19 a ocasiona

    *Reino tin prueba di disponibilidad Arubano pa yega na cambio

    ORANJESTAD(AAN)–Ta na e momentonan culminante pa historia autonomo di Aruba, cu DIARIO a mira luz. Awe cu Aruba ta confronta otro momento historico,

    DIARIO como matutino di Aruba mester opone e forma cu gobernantenan Hulandes kier deshaci di e principionan di Statuut cu ta regla e relacionnan den Reino y ta reconoce Aruba como pais autonomo den Reino.

    Na momento cu Aruba y Reino a yega na un areglo pa e futuro di e pais na mesa rondo, a yega na entendimento entre partnernan den Reino con ta atende cu otro a base di dignidad cu cada uno merece.

    Ta pa e motibo aki den e carta abierta cu DIARIO ta presenta awor na Mark Rutte y Raymond Knops e kier mustra e gobernantenan Hulandes cu nan mester tene nan mes na contenido di Statuut y sigur no uza e situacion di Covid-19 pa pone Aruba na rudia y deshaci di e autonomia pa cual Aruba a paga un prijs halto.

    Na prome luga, como gobernantenan den Reino directamente encarga cu e funcionamento huridico di Statuut, no por exigi gobierno di Aruba pa acepta cambio di e situacion estatal di Aruba den Reino sin aprobacion di Parlamento di Aruba y sigur sin cu a scucha e pueblo den un referendum.

    Statuut na un forma hopi cla ta indica cu pa introduci un ley di consenso manera Hulanda kier haci pa impone un hala nobo di gobernacion financiero riba Aruba, mester wordo aproba dor di pueblo di Aruba pa medio di un referendum, cu Hulanda no a duna oportunidad pa tuma luga.

    Gobierno actual di Hulanda a bay contra e contenido di Statuut y e Constitucion di Reino cu ta dicidi con gobernacion di Reino ta tuma luga y con cada exponente mester atende cu e base democratico cu ta carga Reino y no ta permiti ningun persona pa pone nan mes riba Ley.

    E hecho cu a uza e forma di coresponde di Rijksministerraad cu no ta permiti pa documentonan bandona e circulo di gobierno pa gobierno, ta duna prueba cu a scoge pa un forma cu ta kibra e base democratico y den cual ta exigi gobierno di Aruba pa bay contra e sistema di gobernacion di Aruba cu ta exigi pa gobierno actua basa riba consulta cu pueblo y cu mandato di Parlamento di Aruba.

    Como matutino di Aruba, DIARIO ta rechasa e forma cu Hulanda a actua den un situacion di e coronavirus nobo, cu tin resultadonan bon conoci pa Reino y pa Union Europeo.

    Hulanda ta na haltura kico e coronavirus nobo ta nifica pa gobernacion financiero di e pais, di Reino y di Union Europeo na cual Hulanda ta afilia.

    Cifranan cu awe DIARIO ta presenta ta duna prueba cu Hulanda, cu semper a opone debe nacional, awor ta mira su quota di debe nacional subi pa 63 porciento di e Producto Domestico Bruto.

    Hulanda tambe mester bay ahusta su cifranan di presupuesto di 2020 cu lo cera cu saldo negativo durante e proximo tres añanan.

    Informacionnan financiero di Banco Central di Hulanda y di Union Europeo ta duna prueba di e problema financiero serio cu e coronavirus a nifica pa Hulanda y Europa cu mester ta na haltura di loke nan ta nifica pa Aruba, cu a cuminsa introduci medidanan pa atende cu e problemanan financiero di e pais.

    Hulanda tin prueba di parti di disponibilidad di Aruba pa yega na cambio y Hulanda tin e instrumento CAFT pa atende cu e supervision financiero di Aruba, cu Hulanda mes a introduci for di 2014.

    E forma cu awe Hulanda kier pa Aruba sacrifica su autonomia financiero haciendo uzo di e calamidad di Covid-19 no tin nomber.

    Aruba mester tene su mes na Statuut cu ta exigi pa gobierno di Aruba no mara pueblo di Aruba na leynan di consenso cu ta cambia Statuut prome cu scucha pueblo di Aruba den un referendum.

    Tanto Banco Central di Hulanda como Union Europeo a duna prueba di e incertidumbre di Covid-19.

    Si Reino Hulandes ta di opinion cu e no por sostene Aruba na e momentonan aki, mester bisa esaki sin uza kiebra di e Statuut den cual lucha di un pueblo pa su autonomia ta graba y na un forma cu Pueblo di Aruba no por ta informa di loke Reino kier haci.

    DIARIO ta sostene su Gobierno pa lucha pa e bienestar di Aruba y pa no permiti pa un malesa habri porta pa Aruba wordo forsa di entrega su autonomia pa ricibi e ayudo Hulandes  a base di relacionnan den Reino hancra den Statuut.



    - Advertisement -

    DUNA COMENTARIO

    Please enter your comment!
    Please enter your name here