Home General Parlamento mester nombra representante Aruba den entidad

Parlamento mester nombra representante Aruba den entidad

448
0
SHARE
- Advertisement -

Na Hulanda tambe advertencia pa e ramo legal di entidad nobo 

*Parlamento di Aruba mester dicidi riba pakete di cambio di Ley

*Organonan di Estado manera Raad van Advies mester duna conseho

ORANJESTAD (AAN) — Mas y mas den seno di tur pais den Reino, incluso Hulanda, bosnan ta lanta pa e pakete na cual Hulanda kier mara Aruba a base di e problemanan grandi cu e pais ta confronta den cuadro di coronavirus y problemanan financiero cu ta e pais tabata tin.

E advertencia original di DIARIO, cu a atende e asunto aki cu expertonan constitucional, ta resona mas y mas den Reino Hulandes.

Den e programa di NTR na Hulanda por a tuma nota por ehempel di e Profesor Hulandes Gerard Hoogers cu como specialista a splica riba tereno di Derecho di Estado, a splica e angulonan importante di e exigencianan Hulandes.

Tabata tin algun ponencia sumamente importante cu ta cuadra completamente cu e punto di bista di DIARIO, cu gobernantenan di Hulanda ta deshaci di limitenan di Statuut.

Manera for di prome momento nos a mustra, tur loke Hulanda a pone hunto den e pakete, ta asuntonan cu ya tur e paisnan den Reino na un forma of otro mester reconoce como asuntonan cu mester wordo regla a base di cambionan cu a tuma luga durante ultimo siglo den nos comunidadnan.

Por negocia henter e pakete y yega na fechanan cu mester tin acuerdo. Loke hamas por negocia ta, si ta deshaci di eleccion, representacion di pueblo den Parlamento, e tareanan di Parlamento na nomber di pueblo y e guia di e pais pa medio di su instancianan oficial di conseho (Raad van Advies), control (Algemene Rekenkamer Aruba), participacion di comunidad (Conseho Social Economico).

Statuut na ningun forma ta permiti pa deshaci di e luga central di Parlamento como e organo mas halto di estado, cu ta duna contenido na democracia pa medio di eleccion.

DIARIO semper a sostene cu mester duna e aparatonan di control y di conseho di Aruba mas forsa, dor di pone sancion na e gobernantenan of tur cu ta parti di e ehecucion di nos Cuadro di Ley, den caso cu nan pone consehonan y decisionnan di nos organonan di estado un banda. Na mes manera mester por actua inmediatamente ora un gobernante ta bay contra cuadro di ley y ta mara e pais na debe, na acuerdo di halto riesgo y  no ta atende cu e pais manera un bon tata ta cuida su famia.

Esaki ta puntonan directamente mara na e Orden di Ley cu ta dicidi pa Reino, pa Aruba y tur pais den Reino.

Por comprende cu ya Hulanda a cuminsa ta bay di acuerdo cu cierto puntonan. Entre otro ta papia di nombramento di Arubiano tambe den e entidad cu mester bira un organo di gobernacion (bestuursorgaan).

Pa e organo aki cuminsa funciona, tur pais den Reino no solamente ta acepta e organo pero lo duna nan aprobacion na TUR e personanan cu ta parti di e entidad.

Segun nos leynan pa un pais por aproba algo, Parlamento mester papia pasobra pueblo a scoge Parlamento como su representante y ta Parlamento ta nombra Ministronan y ta Parlamento ta atende tur ley na cual Husticia mester tene su mes.

En corto, e papel di Parlamento, nos sistema electoral, hamas por wordo poni na wega segun nos cuadro di ley manera DIARIO a bisa for di prome momento cu nos a dedica e fin di siman na estudio di e leynan.

- Advertisement -

DUNA COMENTARIO

Please enter your comment!
Please enter your name here