Home Policial Orario di ciere di establecimento di 11’or di anochi ta bay keda...

Orario di ciere di establecimento di 11’or di anochi ta bay keda vigente pa awor

857
0
SHARE
- Advertisement -

Alto Comisario Interino Vanessa Tjon-Kock:

*Controlnan lo sigui y dependiendo di comportacion medidanan por cay

ORANJESTAD (AAN):  Orario di ciere di establecimentonan ta keda un tema di discusion den comunidad y riba esaki Alto Comisario Interino Vanessa Tjon-Kock a indica cu ta haya bastante pregunta riba pakico e orario di 11 pm ta keda vigente y te con largo ta bay wanta esaki.

El a duna di conoce cu den team di maneho a delibera riba e parti aki y na un manera critico a yega na e conclusion cu por lo pronto ta keda cu e orario di 11 pm.

Tjon-Kock a remarca cu e sa cu esaki no ta algo cu ta semper positivo pa e sector cu kier keda mas largo habri. Pero riba esaki a papia den extenso y no ta un decision cu a bin ‘a lo loco’.

Mester tene cuenta cu esaki mirando e desaroyonan cu tin actualmente di Covid-19 na Aruba y mirando e situacion cu ta aden na Aruba.

Un bes mas el a recorda e sector aki pero tambe comunidad en general cu e controlnan ta bay sigui. A ripara durante otro dianan cu na diferente establecimento, e doñonan di esakinan ta haci lo posibel. Pero no solamente tin cu wak riba e parti di e doño di e establecimento, pero tambe riba esunnan cu ta frecuenta e localidad, a subraya.

“Sea consciente di e situacion cu nos ta den dje actual. Abo cu ta frecuenta e establecimento tambe. Sea consciente di e situacion cu nos ta aden. Niun momento niun hende no ta bisando bo pa bo no bay sali of pa bo no keda te den oranan laat riba caya.

Loke nos ta pidiendo ta pa bo tene cuenta cu e parti social, e parti di ‘social distancing’. Tene cuenta, purba proteha bo mes”, e representante di autoridad a expresa.

Tin un di dos ola di contagio di Covid na Aruba y mas cu claro no kier bay bek manera tabata antes Ta haciendo tur posibel pa evita esaki, a subraya.

Relaciona cu e comportacion y si esaki ta escala, por haya un situacion unda otro medidanan ta bay wordo treci dilanti. Esaki ta loke e team di maneho ta evitando den tur momento.

Pesey a suplica na comunidad pa no purba di atrobe bay limita e libertad. A ripara cu ainda despues di 11or di anochi tin hendenan cu ta keda frecuenta e establecimentonan. Automaticamente polis ta esun e ora cu ta bay actua, Tjon-Kock a indica.

Tur hende kier ta socialmente liber riba caya, pero tin cu tene na e reglanan cu ta stipula y pa aworaki e orario di 11’or di anochi ta bay keda vigente, a enfatisa.  

 

- Advertisement -

DUNA COMENTARIO

Please enter your comment!
Please enter your name here