Home General “Nos no ta bay laga boso cay”

“Nos no ta bay laga boso cay”

996
0
SHARE
- Advertisement -

Raymond Knops:

*Islanan mester bira menos dependiente di turismo

ORANJESTAD (AAN): Diabierna mainta despues cu Secretario di Estado Raymond Knops a sinta cu e delegacionnan di St. Maarten, Corsow y Aruba relaciona cu e sosten pa e islanan y e condicionnan mara na esaki, el a tene un rueda di prensa live via YouTube.

Knops a cuminza na bisa cu ningun hende varios luna pasa por a tene cuenta cu e hecho cu un crisis grandi manera esun di COVID-19 lo tabata na caminda.

“Esaki ta nifica cu riba e islanan tin un situacion unda cu hopi hende ta sin trabao y sin entrada, pues nan ta preocupa pa nan futuro”.

Nos tambe ta preocupa y di aki banda mi kier bisa e hendenan aki cu nos no ta bay laga boso cay.

Nos ta para banda di boso y den e temponan cu ta bin hunto cu e gobiernonan di Corsow, St. Maarten y Aruba nos lo haci tur cos posibel pa atende mihor posibel cu e efectonan di e crisis aki, segun Knops.

E Secretario di Estado a sigui bisa cu e crisis tin un impacto asina grandi riba locual ta pasando riba e islanan, pues mester purba di brinda perspectiva pa e hendenan cu ta biba riba e islanan.

Perspectiva riba trabao y riba un bon clima di inversion.

“Na e momentonan aki nos ta purbando di percura pa COVID-19 no plama mas y pa e capacidad medico ta den bon condicion”.

Ora cu e pandemia aki a afecta henter mundo, mesora nos a bisa cu nos ta bay yuda e islanan.

Nos ta bay yuda nan cu equipo medico y medicina, pero tambe cu ayudo humanitario, segun Knops.

El a sigui bisa cu ta lamentable pa constata cu door di e crisis asina tanto hende riba e isla a haya nan mes cu e necesidad di ricibi paketenan di cuminda.

Knops a bisa cu e hendenan ey mester wak esaki como un manera di Hulanda pa yuda nan, pero cu esaki no ta e punto final.

“Nos no kier crea e perspectiva cu durante un periodo largo varios hende mester sigui haya e paketenan aki”.

Di berdad nos kier brinda perspectiva pa e islanan y esey ta posibel, pero solamente si nos tur pone nos schouder bao di esaki y haci e bon escogencianan, segun e Secretario di Estado.

El a sigui bisa cu unda cu ta necesario lo bin cu reforma y ta bay percura pa e gastonan di Gobierno ta structura.

Banda di esaki ta bay purba trece e entradanan di impuesto riba un mihor nivel.

Mester bin tambe un mihor reparticion entre rico y pober riba e islanan, unda cu e schoudernan mas fuerte mester carga e peso mas pisa y no pone esaki riba esnan cu ta mas vulnerable, segun Knops.

“Den e periodo cu a pasa den bon combersacionnan gobierno di e islanan  nos a logra percura cu e consecuencianan di COVID-19 mas posibel a wordo para”.

E paisnan awor ta purbando di wak con ta habri e fronteranan na e manera mas safe posibel.

E islanan durante varios aña a demostra di ta hopi dependiente di turismo y net den e temponan aki unda cu hendenan no por viaha libremente sin mas, e ta mustra cu esey por ta un golpi demasiado fuerte.

Esaki nifica cu e paisnan mester bira menos dependiente di turismo, pa asina den temponan di crisis nan por wanta un golpi, segun Knops.

- Advertisement -

DUNA COMENTARIO

Please enter your comment!
Please enter your name here