Home Cultura Monumentenfonds a firma cu Stichting Rancho awor cu restauracion di forno di...

Monumentenfonds a firma cu Stichting Rancho awor cu restauracion di forno di kalki a keda cla

40
0
SHARE
- Advertisement -

ORANJESTAD (AAN): Durante un atardi special riba Diabierna, den presencia di e partnernan di e proyecto, Stichting Monumentenfonds Aruba (SMFA) a celebra e finalisacion di e proyecto di restauracion di e forno di kalki y a firma un acuerdo di uzo cu Stichting Rancho.

   Di awor en adelante, Stichting Rancho lo por haci uzo libremente di e forno di Kalki como parti di nan tournan y asina lo por continua cu e bon trabou cu e fundacion a bin ta haciendo e ultimo añanan pa asina educa y conscientisa e comunidad tocante e historia di e bario di Rancho incluyendo e forno di kalki cu ta un monumento industrial di 128 aña bieu.

   E ultimo biaha cu a restaura e forno tabata for di añanan setenta y e ultimo añanan e tabata den hopi mal condicion. Debi cu e ta trata di un obheto cu no por huur e ta haci dificil pa por yega na financiamento pa un Proyecto asina aki. Pero danki na entre otro: Aruba Bank, VNO, Unoca y Prins Bernhard Cultuurfonds nos por a logra e proyecto aki y combine cu expancion di expertico local.

   Durante un conferencia na Bermuda SMFA a drenta den contacto cu Parvenir Heritage Restoration and Maintenance company di Trinidad y Tobago cual ta un compania cu hopi experiencia pa traha cu kalki y cu e meta pa amplia e conocemento di esaki den e area di Caribe.

   Asina a mira e oportunidad pa combina e restauracion cu un curso pa por haya e experticio den e ofishi aki cu a bay perdi na Aruba bek.

   Na final di september, Stichting Monumentenfonds Aruba (SMFA) a cuminsa cu e proyecto di restauracion di e forno di Kalki.

   Esaki a bay combina cu un curso na nivel basico di e uzo di kalki pa proyectonan di restauracion. Tanto e curso como e proyecto di restauracion mes tabata bou di guia di Parvenir Heritage Restoration and Maintenance Company.

   Un total di 17 participante a sigui e curso y ricibi nan certificado di Enseñansa pa Empleo. Despues di e curso a continua cu e proyecto di restauracion den cooperacion cu Parke Nacional Arikok cu a pone rangersnan, cu a sigui e curso, disponibel pa hunto cu Parvenir Heritage Restoration and Maintenance company finalisa e proyecto.

  E proyecto maske cu tabata uno simpel compara cu proyectonan anterior, a enfrenta algun contratiempo debi na e retonan den e area y e mal estado cu e forno tabata aden.

  Pa finalisa e proyecto a dicidi pa cera e entradanan di e forno cu heki p’asina evita cualkier incidente tuma lugar den e forno manera den pasado.

  SMFA ta orguyoso di por a contribui na e desaroyo di e area di Rancho cu e proyecto aki y ta spera cu e esaki por ta un inspiracion pa futuro proyectonan den e area di Rancho.

- Advertisement -

DUNA COMENTARIO

Please enter your comment!
Please enter your name here