Mayoria di Aruba kier supervision bon regla

    716
    0
    SHARE
    - Advertisement -

    Cu garantianan fiho cu ta sostene base constitucional democratico

     *Documento di 2014 mester sostene proposicionnan Hulandes

    *Mester mantene integridad organonan basico di estado autonomo

    ORANJESTAD (AAN): Hopi punto cu Hulanda a trece dilanti ta parti di loke ya instancianan oficial di Aruba a presenta sigur for d 2014. Sinembargo, Aruba ta insisti cu Hulanda no tin derecho di deshaci di e base democratico di e pais. Esaki ta haci cu mayoria di Aruba ta sostene e supervision expande manera presenta pa Ministro Presidente Evelyn Wever-Croes.

    “E solo hecho cu for di 2014 un rapport oficial di Conseho Social Economico a mustra riba tur fayo den gobernacion cu Reino tambe a presenta, ta prueba cu mester bin cambio den maneho di e pais.”

    Esaki ta e opinion general den gremionan na Aruba cu ta di acuerdo cu Wever-Croes riba e punto, cu mester acepta supervision di Hulanda pero na un forma bon regla.

    Informantenan a indica na DIARIO, cu ta un hecho cu sin medida drastico, Aruba no por wordo goberna na un forma cu e pais por bandona teritorio di crisis y habri un caminda pa futuro.

    Tin diferente motibo cu ta opta pa supervision di Hulanda. Na prome luga awor tin un instancia cu por determina y controla si por papia di bon gobernacion y asina tambe deshaci di e aspecto politico cu ta causa hopi daño na e bon gobernacion di Aruba.

    “Na momento cu un gobierno kier tuma medidanan cu ta conduci na solucion, por mira con politica ta wordo hunga. Henter Aruba ta consciente cu medidanan mester wordo tuma. Ora tuma medida, politica ta wordo hunga contra e gobernante cu actua a base di bienestar di e pais y a base di bon gobernacion,” a wordo indica.

    Loke a pasa cu Aruba durante e ultimo añanan, ora e situacion financiero a rementa y economia a cay completamente na prome luga dor di e fracaso di Citgo y despues dor di e coronavirus nobo,  por mira claramente con politica tabata wordo hunga na momento cu gobierno tuma medida cu mester a scapa e bienestar di e pais.

    E hecho cu no obstante protesta pisa gobierno Wever-Croes a tuma medidanan cu Hulanda a exigi y cu ta na interes di e bienestar di Aruba manera Hulanda mes a bisa, ta indica cu Hulanda awor mester duna Aruba espacio financiero pa gobierno Wever-Croes por ahusta Aruba na e realidad nobo.

    “Hulanda mester respeta democracia. Ya Hulanda a acepta cu Aruba a actua manera mester a actua den e situacion financiero actual. Awor Hulanda no por impone un sistema dictatorial cu ta deshaci di peso di e organonan democratico di Aruba,” a wordo treci dilanti.

    Tin sosten total pa e formula di Prome Ministro Wever-Croes, cu ta na fabor di mas control pero den cuadro di e base democratico di e pais, cu Hulanda no por ignora.

    Por lo general Aruba ta di opinion cu Hulanda no tin motibo pa deshaci di e gobernacion democratico di Aruba of pa mishi cu e poder y responsabilidad di organonan oficial di estado, pasobra Hulanda no por acusa Aruba di no a actua a base di e consehonan di CAFT of di Reino.

    No tin base legal pues pa Hulanda deshaci di autonomia di Aruba cu e Ley di Reino cu Reino kier impone ta nifica, mientras si mester garantisa supervision Hulandes cu ta un instrumento pa guia e proceso di bon gobernacion.

     

    - Advertisement -

    DUNA COMENTARIO

    Please enter your comment!
    Please enter your name here