Marisol no por ta miembro coalicion sin sosten di POR

    1209
    0
    SHARE
    - Advertisement -

    Acuerdo POR y coalicion, programa  Gobierno y huramento ta dicidi

    *DIARIO ta presenta e Ley cu ta dicidi riba posicion Ministro

    *Ni oposicion ni coalicion por kibra e ley cu ta regla gobernacion

    ORANJESTAD(AAN)–“E actual situacion politico di Aruba ta basa riba e hecho cu nunca a duna importancia na loke Ley ta bisa di participacion di candidatonan na eleccion. Den Ley e candidato ta directamente mara na e partido loke ta raya automaticamente e posibilidad pa un persona declara su mes independiente di e partido cu tabata e vehiculo legal, e instrumento, pa e por a bira miembro di Parlamento.”

    Na palabra expertonan constitucional, cu ta confirma loke na hopi ocasion nan a trece dilanti cu ta, cu na e momento cu un miembro di Parlamento no ta di acuerdo cu su partido, e mester entrega e asiento na e partido cu ta e doño legal di e asiento segun ley.

    Den e caso di Marisol Lopez Tromp cu no kier retira como Ministro cu POR a presenta na e coalicion di cual POR ta forma parti, expertonan constitucional tabata masha breve.

    “Marisol Lopez-Tromp a participa na eleccion como candidato di partido POR, cu a yega na un acuerdo cu otro partidonan, pa forma un coalicion manera den ley ta describi,” a wordo mustra.

    Pa Marisol a participa na eleccion, e mester a firma un documento den cual e ta duna POR e permiso pa pone su persona como nan candidato y asina haci uzo di su persona pa funcionnan di e partido.

    Pues e entrada di Marisol Lopez-Tromp den Parlamento y como miembro di coalicion actual, tabata basa completamente riba su contracto cu POR ora el a acepta pa bira candidato di POR.

    Den Parlamento Marisol mester a actua a base di dos principio. E prome ta e huramento cu el a presta dilanti Dios cu e lo sirbi interes di Aruba, di Reino, di pueblo. Esaki a base di e pakete y e principionan di POR, na cual Marisol mester a mara su mes for di prome momento cu el a firma e acuerdo cu POR pa e fungi como nan candidato.

    E segundo principio ta, cu e mester a actua na defensa di loke e partido POR den eleccion a presenta.  Marisol Lopez Tromp tabata na haltura di tur persona cu lo tabata riba e lista hunto cu su persona y mester a dicidi pa su mes, prome cu e firma e acuerdo cu POR, si e ta di acuerdo cu nan pensamento cu mester tabata hancra den e programa di partido, cu mester ta parti di e programa di gobierno.

    Den Parlamento pues, Marisol no por sirbi su propio opinion, pero mester sirbi opinion di e partido cu e ta representa a base di e acuerdo cu el a firma pa bira nan candidato y cu a haci posibel pa nan uza su nomber riba lista.

    Partido POR, na momento cu el a forma gobierno como parti di e coalicion actual, mester tene su mes na e programa di gobernacion den cual nan programa di partido tambe ta inclui.

    Esaki ta haci cu tur miembro di tur partido di coalicion mester ta un solo pensamento ora ta goberna a base di e programa di gobernacion cu a keda presenta na Parlamento y na Pueblo na 2017.

    Esaki ta e base di funcionamento di e pais.

    Partido POR a dicidi cu Marisol Lopez Tromp lo a reemplasa Otmar Oduber, pero por a dicidi tambe cu un persona cu no ta den Parlamento of ta riba otro puesto riba su lista, por a bira Ministro pasobra e puesto di Ministro den coalicion ta di POR, segun e Orden di Ley riba cual gobernacion ta basa.

    Si e no ta di acuerdo cu POR e mester retira como ministro y como miembro di partido, loke automaticamente ta nifica como miembro di coalicion actual.

    Expertonan a mustra DIARIO cu loke ta pasa actualmente ta completamente for di normalidad y contra reglamentonan di eleccion, cu Parlamento como baluarte di e sistema democratico di Aruba, mester respeta.

     

     

     

    - Advertisement -

    DUNA COMENTARIO

    Please enter your comment!
    Please enter your name here