Home Turismo Lo surpasa e cantidad di 7 mil turista cu a proyecta pa...

Lo surpasa e cantidad di 7 mil turista cu a proyecta pa luna di Juli

147
0
SHARE
- Advertisement -

CEO di ATA, Ronella Tjin Asjoe-Croes:

ORANJESTAD (AAN):  CEO di Oficina di Turismo, Ronella Tjin Asjoe-Croes a indica diaranson anochi cu ta hayando hopi ‘feedback’ positivo pa loke ta e proceso di e reapertura di frontera y e proceso di imigracion online.

El a remarca cu esaki ta un bon salida pa Aruba, como un di e top 4 destino den Caribe. Tin hopi wowo di esnan cu ta competi cu Aruba, pero ta hopi satisfecho cu e resultadonan te cu aworaki.

Tjin Asjoe-Croes a laga sa cu tin un total registra di vuelonan, entre 13 – 19 di Juli, cu ta ekivalente na 78 vuelo di diferente region pa e siman aki. For di esaki, un total di 39 ta for di Merca y ta papia di un promedio di 5-6 vuelo pa dia.

Riba diasabra, cu ta e dia mas ocupa, ta sperando un total di 12 vuelo for di diferente region y 10 for di e mercado di Merca. Esaki ta cifranan cu a ricibi di aeropuerto Reina Beatrix, a bisa.

Tin dos indicador pa pronostica e cantidad di hende cu por spera. Esaki ta inclui turista y residentenan.

Pa esaki tin e plataforma di imigracion cu ta duna cierto datonan tambe. Si mira e total di pasaheronan cu lo por ta sperando, esaki ta rond di 5 mil pa e siman aki na total y esaki por keda cambia.

Si ta wak e cantidad di hendenan cu a registra pa medio di e plataforma di imigracion e ta duna cifranan tambe. Por bisa cu un total di 4100 persona a indica cu nan a yega caba of cu nan a completa e proceso pa asina yega e siman aki, E CEO di ATA a señala.

Ta papia akinan di 4100 pasahero y aworaki ta na 5 mil y ta keda monitorea esaki.

A agrega cu tin un preocupacion toch pasobra e medidanan pa drenta Aruba no ta leve. Nan ta rekeri di cada viahero tur e atencion necesario. No ta un proceso facil y ta purba hacie facil door di e plataforma di imigracion online, di App, etc.

No obstante, ta mirando hopi hende cu ta dicidi di haci e viahe toch. Otro preocupacion di e viaheronan ta cu mayoria ta purba di haci e test 72 ora prome cu nan viahe pa asina nan pone riba e plataforma online.

Ronella Tjin Asjoe-Croes a sigui bisa cu Aruba ta beneficiando aworaki pa e echo cu Europa ta cera pa e mercado mericano. Pero toch, si compara Aruba den Caribe, Aruba ta keda mas stricto cu otro paisnan, pa loke ta rekisitonan pa entrada.

Finalmente, el a duna di conoce cu ta surpasando locual a proyecta pa luna di Juli. Aworaki por bisa cu por ta surpasando toch e 7 mil turista cu a proyecta pa luna di Juli. Lo sigui monitorea e situacion, a remarca.   

- Advertisement -

DUNA COMENTARIO

Please enter your comment!
Please enter your name here