Home Salud ImSan cu medidanan di prevencion pa proteha pashent y trahador

ImSan cu medidanan di prevencion pa proteha pashent y trahador

172
0
SHARE
- Advertisement -

Entrante dialuna awor no por drenta ImSan mas sin un cita previo

ORANJESTAD (AAN):  Durante un conferencia di prensa Diabierna mainta na Instituto Medico San Nicolas (ImSan), Ruthmila Odor – Croes kende ta clustermanager pa departamento di Wowo y departamento di Cirugia a splica cu entrante Dialuna 6 di Juli 2020 tur persona cu ta bay ImSan mester tin mondkapje bisti.

            El a bisa cu esey ta e manera pa e cuida e pashentnan  y tambe e trahadornan. Tin cu para keto y realisa ki tipo di pashent ta bishita ImSan. ImSan tin un departamento di Radiologia cu ta pa pashentnan cu sistema abao y tin cu cuida nan extra.

            Tambe tin e Centro di Dialyze cu ta traha cu tres diferente shift y cu ta un departamento dunando servicio den forma constante. Nan ta pashentnan di risico halto.

            E departamento di wowo, mayoria di e pashentnan tin diabetes, presion halto y nan ta hendenan di edad avansa, Odor-Croes a indica.

            El a sigui splica cu pa e motibo aki, nan a ripara e ultimo lunanan cu tabata tin hopi ahuste cu mester a implementa na nan departamento di wowo.

            E meta ta pa e clientenan tin e trankilidad cu na ImSan a haci tur di nan parti pa por cumpli cu distanciamento fisico. Tin un persona para na e porta cu ta bay guia e pashent na e departamento cu e tin cu yega.

            Entrante dialuna awor no por drenta ImSan mas sin un cita previo. Ta bay tin un number cu por comunica via WhatsApp pa casonan di emergencia di wowo cu por tin of cu kier pa haya informacion. Tin un triagist cu ta bay yuda duna indicacion pa bay docter di cas of pidi pa un optometrista.

            Nan ta espera cu esey lo por alivia e demanda halto cu tin pa drenta na Departamento di Wowo, a señala.     

            Odor-Croes a laga sa cu nan ta digitalisando y cu e sistema aki por manda potret di e verwijsbrief, di e carchi di AZV. Ta purba di acomoda e pashentnan di ImSan na tur manera cu ta posibel, a splica.

            Un otro aspecto na cual el a referi na dje ta orario. ImSan tabata traha di 8 am pa 4 pm, di dialuna pa diabierna. E demanda ta hopi halto. Por a keda traha den e orario ey, pero e team di profesional ta trahando for di basta luna for di 6 am.

            Por ehempel, docternan di wowo ta cuminsa traha 6 am y ta caba te laat anochi. Segun e urgencia, ta duna un orario cu ta basa riba e cantidad di stul cu tin disponibel. Segun urgencia, tambe lo otorga e citanan, Ruthmila Odor-Croes a remarca.

            ImSan ta pidi pa esnan cu mester di nan servicionan pa yama na nan telefon pa haci cita na 524-8833 of por manda un message na WhatsApp 569-4233 (disponibel di dialuna pa diabierna di 8 am pa 12 pm).

            Pa loke ta e mail adres esaki tambe ta un sistema nobo cu nan ta cuminsa uza dialuna awor pa traha cita: [email protected]

- Advertisement -

DUNA COMENTARIO

Please enter your comment!
Please enter your name here