Home Parlamento Hulanda kier Aruba acepta RFT inhusto y meymey den un crisis

Hulanda kier Aruba acepta RFT inhusto y meymey den un crisis

218
0
SHARE
- Advertisement -

Parlamentario Endy Croes: Un siman hopi pisa nos dilanti

ORANJESTAD (AAN):   Parlamentario Endy Croes ta totalmente desacuerdo cu Hulanda den na manera cu Hulanda ta hibando su politica. Diabierna awor tin Rijksministerraad unda tin riba agenda steun financiero locual ta e di 3 tranche di placa.

Hustamente aki ta unda Hulanda  a tuma un postura cu un actitud incorecto contra Aruba. Hulanda kier pa Aruba acepta Rijkswet Financieel Toezicht ( RFT) mescos Corsow y St Maarten.

 /// Tiki di historia di nos Status Aparte:

    Dia 1 di Januari 1986 Aruba a sali di Antillas Hulandes y a drenta su Status Aparte y pues a bira un pais autonomo cu lasonan directo cu Hulanda reglamenta den un Statuut. Esaki tabata fruta di un lucha tenaz lidera pa e Libertador Betico Croes y su partido MEP cu e sosten masal di pueblo.

    Durante e lucha aki Betico a wordo maltrata, politiconan e tempo aya na mando a manda Riot Comando riba pueblo (Augustus scur 1977) a drenta cas di Mama y Tata di Betico, Betico a wordo sera den prison, Betico a wordo dispara pa un agente policial riba veld di Winston momento cu e tabata bishita su pueblo (24 April 1983).

     Betico a accidenta 3 ora promer cu e por a mira su soño y logro wordo cristalisa esta 31 di December 1985 pa 9 pm y ta bay den coma y un soño profundo y no a lanta nunca mas y ta fayece despues di 11 luna den coma 26 di November 1986.

     Durante e proceso aki Betico a logra uni e pueblo aki creando nos Himno, nos bandera y identidadnan hopi valioso. Nunca el a ria ni dobla pa presionnan aheno entre otro di Hulanda. Ta e curashi y balentia aki combina cu un cantidad di strategia y sosten di su equipo y maquinaria di Movimiento Electoral di Pueblo mas sosten di pueblo nos a logra e Status Aparte. Manera Betico mes a bisa cuide manera un clompi di diamante!

 ///Mike Eman tabata e pior desaster cu Aruba a conoce:

Kico a trece nos akinan? Desde 34 aña pasa momento Aruba a drenta Status Aparte 1 di Januari 1986 tabata net momento Refineria Lago a dal su portanan sera. Pues meymey den momentonan sumamente dificil cu retonan grandi.

   Pais Aruba den e siguiente 23 añanan desde 1986 pa 2009 maneha pa gobiernonan di tur signatura e presta placa na un manera responsabel manera tur pais rond mundo. Na October 2009 momento MEP a bandona gobierno e debe nacional tabata na 43%.

   IMF ta stipula cu economia chiquito manera di islanan un debe nacional maximo di 50% ta saludabel. Mike Eman y AVP manera nan a drenta gobierno na 2009 den solamente 8 aña nan a presta 2000 miyon florin y a redobla e debe nacional te 93%. Pues di cada florin cu un pagador di belasting paga 93 cent ta comprometi na debe. Hulanda mester a frena Mike Eman via un KB na 2014.

    Aki ta unda Mike Eman a rabia y a yama Hulandesnan pa “verkrachters” y a bay bebe ensure bou palo den welga di hamber. Hulanda a bay over na mara Mike Eman su man cu pia den un protocol di 2 di mei 2015 y despues legalisa esaki  via CAFT y Ley di LAFT. Si no ta pa e 2000 miyon cu Mike Eman y AVP a presta den apenas 8 aña Aruba awe lo ta den un “comfort zone financiero” y no tabata tin mester ni di e ayudo di Hulanda.

    Esaki ta e berdad y realidad. Historia awe ta demostra cu Mike Eman a abusa di e confiansa cu pueblo a brinde.  8 aña di Mike y AVP tabata e pior desaster cu Aruba a conoce. Confiando Mike Eman y AVP  ta mescos Bo a confia pushi cu Bo pisca. Laga nos hunto siña di e les amargo aki.

 /// Hulanda hopi inhusto y no ta demostra empatia:

   Dia 10 dia October 2010 ( 10-10-10) pues 24 aña despues cu Aruba a haya su Status Aparte nos paisnan ruman Corsow y St Maarten tambe a logra nan Status Aparte. Sinembargo nan Status Aparte ta diferente cu esun di Aruba. Hulanda a paga tur debe di Corsow y St Maarten na balor di 1600 miyon Euro casi 4 biyon florin y nan a acepta pa bay den un asina yama consensus Rijkswet.

    Awe Hulanda kier Aruba acepta RFT mescos Corsow y St Maarten sin cu Hulanda paga ningun debe pa Aruba. Anto esaki Hulanda kier Aruba acepta meymey den un crisis. Con mal mama Bo por ta pa solamente pensa di hasi algo asina cu un pueblo noble den momentonan mas dificil cu un crisis mundial ta asotando mundo henter? Esaki no tin pordon! Nos ta spera cu Hulanda recapacita y trata Aruba cu e respet cu nos mester manera partners nan igual den reino respetando nos Status Aparte.

- Advertisement -

DUNA COMENTARIO

Please enter your comment!
Please enter your name here