Gobierno Hulandes ta deshaci di orden di ley

    862
    0
    SHARE
    - Advertisement -

    Wever-Croes mester defende Constitucion di Reino y Statuut

    *Camara di Comercio cu punto clave den actuacion Hulandes

    *Situacion di emergencia a kita pan di ciudadano Hulandes na Aruba

    ORANJESTAD(AAN)–“Tur gobierno na mundo por faya. No ta pasobra ta gobierno Hulandes a tuma un decision mester dicidi cu e mester ta bon. Den e caso di e asistencia financiero na Aruba, Gobierno Hulandes cu ta e partner mas grandi den Gobierno di Reino, a faya.

    Esaki ta opinion di expertonan cu a asisti DIARIO den compilacion di articulonan pa informa Aruba riba desaroyonan cu nunca a pensa cu por a presenta nan mes den seno di Reino Hulandes cu ta wordo goberna a base di e Constitucion di Reino cu ta ehecuta e Statuut.

    “Statuut ta regla e forma con partnernan den Reino mester atende cu otro y Hulanda sin mas no por crea un entidad cu ta deshaci di e sistema di gobernacion di paisnan den Reino,” a wordo mustra dor di informantenan.

    Nan a mustra cu ya tin areglo pa supervision di Reino den e maneho di placa di Aruba  for di 2014 ora minister Plasterk di Hulanda a bini Aruba pa atende cu gobierno anterior riba e situacion financiero na Aruba.

    Gobierno di Aruba a tene su mes na e condicionnan exigi dor di Hulanda bou situacionnan dificil y ta a base di continuo medidanan cu mester a tuma, e presupuesto di Aruba a wordo trata den un situacion marca pa e coronavirus nobo, cu a destrui tur planificacion di Aruba.

    “Gobernantenan di tur pais mester tene nan mes na reglanan democratico y na e orden di Ley cu ta goberna Reino Hulandes y no ta exclui ningun gobierno. Mescos cu Aruba mester tene su mes na e cuadro di ley, Hulanda tambe mester tene su mes na reglanan di Constitucion y di Statuut,” a wordo treci dilanti.

    “Na e momento aki Aruba ta den un situacion di emergencia. E ciudadano Hulandes na Aruba ta wordo someti na pobresa.  Covid-19 a kita pan for di boca di e ciudadano Hulandes na Aruba. Statuut y Constitucion ta regla e yudansa cu e ciudadano Hulandes mester haya na e momentonan aki,” a wordo treci dilanti.

    E hecho cu Aruba no a haya oportunidad pa atende cu e observacionnan Hulandes, tambe a bini dilanti y ta cuadra cu e posicion di Camara di Comercio di Aruba.

    Camara di Comercio y Industria (KvK) a gradici Gobierno di Aruba pa e oportunidad di por a ricibi informacion encuanto e pakete di condicion cu Hulanda a presenta pa por bin na remarca pa e tercer financiamento cu ta necesario pa por duna sosten na comercio y personanan cu a perde entrada.

    Camara di Comercio ta mustra cu “Minister-president, Sra. Evelyna Wever-Croes, a indica cu tin 18 condicion mara na e financiamento di Hulanda y cu Aruba mester cumpli cu tur pa por bin na remarca. Sinembargo, Hulanda a prohibi Aruba pa por haci e documento aki publico, locual ta impedi Aruba di por hiba un discusion sano si e condicionnan ta rasonabel, factibel y si lo por wordo ehecuta a corto plaso.

    Aunke KvK a vocifera pa basta aña caba cu algun reformacion ta necesario pa por mantene financia publico duradero y a duna varios recomendacion, no ta posibel pa por bay di acuerdo cu e condicionnan stipula door di Hulanda sin tin previo conocemento di e contenido di e pakete di condicion.

     Na momento cu e documento wordo haci publico, KvK lo desea di haya e oportunidad pa por duna su opinion y contribucion.

    KvK ta sorprendi cu Hulanda a scoge pa un proceso cu no ta transparente.

    KvK ta consciente cu ta urgente y necesario pa ricibi financiamento pa e economia di Aruba por lanta cabes bek y pa por provee den e necesidad humanitario. KvK ta keda disponibel pa participa den e discusionnan,” asina e documento ta conclui.

    Awe mas informacion mester alcansa Aruba for di Hulanda caminda Ministro Presidente Wever-Croes mester atende cu Reino den uno di e incidentenan mas grandi cu Reino a conoce for di momento di introduccion di Statuut.

    - Advertisement -

    DUNA COMENTARIO

    Please enter your comment!
    Please enter your name here