Home Hudicial E promer Fiscal encarga cu kitamento di placanan procedente di actividadnan criminal...

E promer Fiscal encarga cu kitamento di placanan procedente di actividadnan criminal ta bandona Aruba

4021
0
SHARE
- Advertisement -

ORANJESTAD (AAN): Diabierna tabata e ultimo dia di trabao di Fiscal mr. Akkerman. Despues di algun aña estableci na Aruba, e ta regresa Hulanda.

   Mr. Akkerman lo regresa Hulanda cu un cantidad di experencia di casonan interesante cu el a atende na Aruba. 

  KITA CAPITAL CRIMINAL:

   DIARIO por a compronde cu mr. Akkerman tabata e promer Fiscal cu tabata encarga cu e dificil tarea di kitamento di capital criminal.

Procurador-general di Aruba na December 2018 a saca un instruccion nobo riba tereno di ‘afpakken’. E instruccion aki ta establece reglanan pa kitamento (‘afpakken’) di capital criminal door di Ministerio Publico.

   Kitamento di capital criminal ta di gran importancia den bringa criminalidad organiza y criminalidad subversivo.

   Pa logra exito den esaki, cooperacion entre e partnernan den cadena di seguridad y husticia ta crucial!

   Ta pa e motibo ey mes cu Afpakteam Integral di Aruba a worde lanta riba prome di maart 2017 entre Ministerio Publico, Cuerpo Policial di Aruba, Aduana,

    Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst), Koninklijke Marechaussee (KMar), Kustwacht Steunpunt Aruba, Meldpunt Ongebruikelijke Transacties (Meldpunt) y RST.

   Desde cu Afpakteam a worde lanta, tabatin logronan importante.

   Den varios investigacion Afpakteam a pone beslag riba propiedadnan manera cas, vehiculonan, brommernan y speedboatnan.

   E biennan aki lo worde bendi na findishi, y e placa cu nan lo rindi lo worde deposita directo den e Fondo di Combati Criminalidad (Criminaliteitsbestrijdingsfonds).

Afpakteam a hinca desde su inicio un 1.7 miyon Florin di capital criminal den e Fondo di Combati Criminalidad.

   E cen di e fondo aki ta worde usa pa bringa criminalidad na Aruba, loke kier meen cu e ta placa cu ta bay directamente na benificio di comunidad.

E instruccion di afpakken ta trata tambe tramitacion di beslag. 

 PASION PA SU TRABAO:

   Den sala di Corte por mira cu e ta bringa pa e pensamento di Ministerio Publico y tin biaha ta hasta debati cu abogado den casonan penal. Hopi biaha bo ta mira mr. Akkerman ta hala atencion di e sospechoso cu e mester bisa e berdad.

  Den su rekisitorio hopi biaha e laga sa cu e sospechoso ta sinta gaña den Corte. Casi tur ora mr. Akkerman ta reacciona riba ponencia di defensa pa defende su punto di bista.

   DIARIO ta gradici mr. Akkerman pa su aporte na Ministerio Publico di Aruba y ta desee tur clase di exito na Hulanda.

- Advertisement -

DUNA COMENTARIO

Please enter your comment!
Please enter your name here