Home Gobierno E aña aki mester concentra riba Aruba y laga e agendanan politico...

E aña aki mester concentra riba Aruba y laga e agendanan politico pa otro aña

250
0
SHARE
- Advertisement -

ORANJESTAD (AAN):   Gobierno ta sigui cu e plan pa habri frontera. Prome Minister Evelyn Wever-Croes a duna di conoce e pakico.  El a señala cu aworaki cu Covid-19 ta bao control, a pesar cu tin dos caso cu ta isola, ta importante pa pensa riba e siguiente stap cu ta pa desaroyo di economia pa asina entrada por cuminsa drenta bek.

Segun e mandatario, Aruba no por keda presta placa constantemente. Berdad Hulanda a presta na cero porciento, pero mester tene cuenta cu un pais no por keda presta te den eternidad pasobra sino nunca mas lo lanta cabez for di esey.

A pone rekisitonan bastante pisa. Rekisito di 100% testing na entrada, seguro. Nan ta costoso y pisa, pero e intension ta pa pone e ciudadano central y na prome lugar.

Tin hende cu ta haya cu e gastonan ta mucho halto y cu e turistanan no lo bin. “Mi ta kere cu e contesta ta cu bo bida bal mas cu esey y pesey nos ta pone e condicionnan aki”, Evelyn Wever-Croes a remarca.

E test na entrada ta un filter pa e casonan di personanan cu por tin e virus sin cu nan sa pa evita cu nan ta drenta Aruba cu ne. Ta cobra $75 pa e test cu ta wordo haci door di Hospital y apenas ta cubri e gastonan. Hopi pais ta cobra hopi mas placa pa e testnan aki, el a agrega.

Aparte di esey ta pidi un seguro y esaki ta pa cubri e gastonan medico di e turista, pero tambe e gastonan di isolacion di e turista. Esey talvez hopi hende no a compronde. No kier core ningun riesgo na Aruba.

Ora cu un turista resulta positivo pa Covid-19, su hotel ta bay bis’e cu e tin cu sali for di e hotel. E persona e momento ey, no por subi avion bay bek pasobra ningun avion ta lag’e subi si e tin Covid-19. E tin cu bay otro localidad.  Gobierno ta busca otro acomodacion pa nan, manera  Airbnb, apartamentonan caminda nan por ta confortabel den isolacion, pero gobierno no por paga esaki pa nan, e mandatario a enfatisa.

E persona aki por bira hopi malo y tin cu bay hospital y e seguro ta cubri’e. Pero si e no ta asina malo pa bay hospital, e lo tin cu bay un otro acomodacion y tin biaha e por keda te 4 siman eynan.

E  alohamento alternativo ey ta costa hopi y seguro ta pidi un seguro mas extenso cu solamente un seguro medico.  Esaki ta e condicionnan cu Aruba a pone pa habri e frontera. “Pero loke nos mester di awor pa dilanti ta pa cada ciudadano di nos pais pone Aruba prome”, el a declara.

E aña aki mester concentra riba Aruba y laga e agendanan politico pa otro aña.

 

- Advertisement -

DUNA COMENTARIO

Please enter your comment!
Please enter your name here