Home Policial Dos homber arma a atraca pareha piscado na altura di Fisherman’s Hut

Dos homber arma a atraca pareha piscado na altura di Fisherman’s Hut

376
0
SHARE
- Advertisement -

ORANJESTAD (AAN): Un caso serio a keda registra Diasabra anochi laat, cual mesora a pone un cantidad di unidad Policial subi caya pa check un atraco.

   E biaha aki el a socede riba un pareha cu a bay na altura di Fisherman’s Hut panort di Palm Beach pa pisca.

   Diripiente e pareha aki a wordo sorprendi cu dos homber di habla hispano, lomba sunu cu diripiente a yega.  Nan tabatin arma di candela y a atraca nan.

   E hombernan a papia den spaño perfecto, y e victimanan a reconoce e accento Colombiano den nan forma di papia.

   Despues di esey, e hombernan aki a subi un vehiculo y a core baha na awa.  E victimanan a bay busca forma pa yama Polis como cu nan a keda sin smartphone.

   Ora cu Polis a haya yamada, e momento ey ta caba 12’or di mey anochi Diadomingo a bati.  Mesora Polis a cuminza mobiliza unidadnan rumbo pa e area cerca di Fisherman’s Hut.

   E prome unidad di Polis cu a yega, a bin haya e pareha tur spanta pa loke nan a caba di pasa aden.  Inmediatamente nan a relata cu 2 homber cu arma di candela den man, a atraca nan.

   Vocero di Polis, Lito Lacle a confirma na DIARIO cu e atracadornan a bay cu un suma di placa di como 200 Florin, tambe nan a bay cu e yabinan di un vehiculo Jeep cu nan tabatin eynan, y e atracadornan a bay cu nan Smartphone tambe.

   Polis a haya detaye tambe di e vehiculo cu e atracadornan aki ta coriendo cune.  Nan a djis bay cu e yabi, pero no cu nan Jeep Wrangler.

   Atraco Team a presenta na e lugar, y a solicita yudanza di Oficialnan Hudicial Forensico di BFTO, y tambe Slachtofferhulp pa sostene e pareha victima.

   Cuerpo Policial ta pidi esun cu a wak algo of sa algo yama e tiplijn di polis cu ta 111-41.  Si acaso abo ta biba eybanda y bo tin security camera cu por a graba algo, bo tambe ta ser pidi pa contact autoridad.

  Pues por mira aki, cu hasta ora bo bay Pisca, tin chens cu bo ta bira victima di crimen!  Un conseho pa tur hende ta extra cauteloso e dianan aki.  Hopi hende ta sin placa, y ta recuri pa comete crimen pa asina haya placa.

 

- Advertisement -

DUNA COMENTARIO

Please enter your comment!
Please enter your name here