Home Hudicial Dos agente di Polis condena pa pasa informacion secreto pa un periodista

Dos agente di Polis condena pa pasa informacion secreto pa un periodista

233
0
SHARE
- Advertisement -

Hues ta haya nan culpable di a viola lealtad pa trabao

ORANJESTAD (AAN) – Ayera mainta e agente di Polis homber T. y e agente di Polis dama R., a presenta dilanti Hues caminda ambos ta wordo haya culpable di a viola secrecia di trabou door di pasa informacion varios biaha na un periodista. Ambos a wordo condena na 100 ora di trabou pa comunidad of 50 dia sera y 3 siman di prison condicional cu 2 aña di prueba.

ACUSACIONNAN

Ta asina cu ambos agente di Polis ta suspendi pendiente un investigacion disciplinario. Fiscal a acusa T. di a viola secrecia di su trabou door di intencional pasa informacion varios biaha na un periodista entre 22 Augustus 2016 y 1 December 2019.

  Fiscal ta acusa e agente dama R. di a viola secrecia di su trabao door di intencional pasa informacion varios biaha na un periodista den e periodo di 31 December 2016 y 26 Augustus 2018.

DUNA INFORMACION SECRETO

    Ta asina cu e agente T. a admiti di tabata duna informacion na e periodista T. El a bisa Hues cu e periodista T. tabata haci pregunta y e tabata confirma esakinan. Hues a remarca cu e agente T. tin 25 aña di servicio den Polis y tin funcion di hefe, ta bay duna periodista T. informacion.

    Segun e agente T., e kier a yuda e periodista. Hues a remarca cu e agente T. no ta vocero di Polis y pakico e ta bay duna informacion asina. Hues a bisa pakico e agente T. no a bisa e periodista T. cu e ta bay puntra su hefe si por duna informacion. E agente T. a bisa Hues cu e ta mira superiornan ta confirma informacion na periodistanan y el a dicidi di haci esey tambe. Hues a señala cu e agente T. a duna informacionnan detaya di un menor di edad (14) cu a wordo gara cu un arma di candela. El a mustra cu pa tres aña largo ta dunando e periodista T. informacion. Ta asina cu e agente T. a bisa Hues cu e no tabata haci’e pa placa sino djis pa yuda. El a bisa cu loke ta mas serio ta e otro coleganan cu tabata haci esaki pa placa.

   E agente dama R. tin 16 aña Polis. Hues a mustra cu a investiga e periodista T. su cellular y a haya cantidad di WhatsApp. R. a admiti di a papia cu e periodista T. via WhatsApp. El a bisa cu e no a viola secreto pasobra loke el a bisa e periodista ya tabata den prensa. Hues a bisa cu for di investigacion di Polis ta mustra cu no ta tur informacion cu R. a duna ya tabata conoci den prensa. Hues a mustra cu November 2017, e caso asesinato De Vuyst, R. lo tabata papia cu e periodista T. di e caso. El a suministra informacion di autopsia y pidi pa no publica pasobra e ta secreto y ainda e famia no sa. Hues a mustra cu aki R. ta bisa un secreto y ta pidi e periodista pa no publica. Hues a menciona mas caso.

EXIGENCIA DI FISCAL

   Fiscal a bisa cu investigacion Kinikini a mustra cu algun agente di Polis tabata suministra informacion na periodistanan. Un di nan ta e agente T. Fiscal a mustra cu Polis ta obliga pa tene secreto di informacion. Violacion di tene secreto ta castigabel. Actualmente e agente T. ta suspendi en espera di investigacion disciplinario. Fiscal a mustra cu e periodista T. a nenga di duna declaracion den e caso aki. Fiscal a mustra cu e agente T. tabata un hefe na Polis y 6 biaha a constata cu e tabata suministra informacion na e periodista T. Fiscal ta haya cu e agente T. a kibra e confianza cu Polis tin den dje. A duna mal imagen di Cuerpo di Polis. Como hefe di Polis, e mester tabata sa mihor. Fiscal a exigi 75 ora di trabou, 3 siman di prison condicional cu 2 aña di prueba.

   Fiscal ta haya R. culpable. E tabata traha na departamento forense y tabata haya informacionnan importante y delicado di casonan. E tabata duna informacion secreto na e periodista T. cual informacionnan tabata delicado y secreto. Fiscal ta haya cu R. a abusa di su funcion pa duna informacion secreto na periodista. A daña imagen di Cuerpo di Polis. Durante periodo largo a duna informacion. Fiscal a exigi 125 ora di trabao pa comunidad y 5 siman di prison condicional cu 2 aña di prueba.

ABOGADO

Mr. Kock, Polis tin biaha tin cu anda cu informacionnan hopi delicado. Sinembargo no por papia di secreto sin mas. Segun e ley, esnan cu papia secreto di Polis, ta castigabel pa ley. El a menciona sentencia di Corte Supremo, caminda no tin un splicacion cla pa cu e definicion divulga secreto. E abogado a bisa Hues cu no tin ningun sentencia cu Polis a duna informacion secreto na periodista. E ta haya cu mester haci diferencia riba informacion y secreto. Tin informacion cu temporalmente ta un secreto pendiente di un investigacion. Si un accidente a sosode of detencion di un persona, no ta un secreto. E ta mas bien e privacidad di un persona y pesey ta e persona concerni mester haci un keho. Door cu no tin ningun denuncia, mester declara Ministerio Publico no admisibel. Tambe ta haya cu no por persigui e dos agentenan penal. Esey no ta kita afor cu como ambtenaar por persigui e dos agentenan pero esey no ta castigabel. Segun e decreto ministerial no ta papia di castigo. E ta haya cu si duna condena di castigo, nan lo perde trabao. El a pidi Hues pa declara T. y R. liber.

SENTENCIA

   Hues a pospone e caso pa bay evalua si e ta bay dicta sentencia di biaha of no. Hues a bolbe y a dicta sentencia di biaha. Hues ta haya cu ambos agente di Polis ta culpable di a duna informacion secreto na un periodista. Segun Hues, T. como hefe mester sa masha bon cu e no por duna informacion. R. como investigador sa masha bon cu no por duna informacion. Ta caso hopi serio caminda a viola lealtad na Polis pa yuda un periodista. E casonan aki a haya hopi atencion den comunidad. Por spera cu lo tin castigo disciplinario. Hues a condena nan na 100 ora di trabao pa comunidad of 50 dia sera. Tambe 3 siman di prison condicional cu 2 aña di prueba.

 

- Advertisement -

DUNA COMENTARIO

Please enter your comment!
Please enter your name here