Home Gobierno Diabierna tabata un dia grandi pa Aruba cu yegada di prome vuelonan

Diabierna tabata un dia grandi pa Aruba cu yegada di prome vuelonan

77
0
SHARE
- Advertisement -

Minister Dangui Oduber

ORANJESTAD (AAN): Durante conferencia di prensa di Gobierno riba diabierna anochi, Minister di Turismo, Salubridad y Deporte, Dangui Oduber a duna varios update riba diferente topico.

E prome update ta relaciona cu apertura di frontera cu Merca, na unda diabierna tabata un dia grandi pa Aruba cu yegada di prome vuelonan. Cu hopi optimismo y positivismo Aruba a habri frontera cu Merca, despues di varios siman di preparacionnan intenso, un planning masal a tuma lugar pa tuma medidanan pa limita e riesgo di importacion mas tanto posible. Comunidad por ta satisfecho cu a tuma tur medida cu tabata den nan alcance pa asina limita e riesgo.

Diabierna tabata un dia basta ocupa na aeropuerto si considera cu pa varios luna aeropuerto tabata cera, no tabatin trafico di turistanan mes na aeropuerto. Diabierna tabatin 7 vuelo di Caribe Hulandes, 5 vuelo for di Merca, 1 vuelo for di Europa, cu yegada di un total di 970 pasahero.

Diasabra lo ta e dia di mas druk di e weekend aki, cu yegada di 2 vuelo di Caribe Hulandes, 10 vuelo for di Merca, 2 vuelo for di Europa, cu un total di 1738 pasahero. Pa loke ta trata diadomingo, lo tin 5 vuelo di Caribe Hulandes, 7 di Merca y 1 di Europa, cu un total di 1278 pasahero. Casi 4 mil turista lo yega Aruba den fin di siman aki.

Minister Oduber a bisa cu e testing ta obligatorio na tur pasahero, sea nan ta upload nan test prome cu nan bin Aruba of na momento cu nan ta yega Aruba na mester haci e test obligatorio. Diabierna tabata un test den practica, pa tur e preparacion cu a tuma lugar den ultimo simannan.

Minister a agrega cu nan ta hopi satisfecho con e procedura a bay na Aeropuerto, na unda nan a midi e tempo cu ta tarda, na momento cu e turista ta sali for di e gate te ora e ta pafor di e terminal, esaki ta varia entre 90 minut cu 2 hora.

Nan tambe a midi cuanto e swab ta dura na momento cu e test mester wordo haci, esaki ta bay relativamente lihe. Den dos minut ta swab un turista, pa despues e sali pafor y wordo transporta pa nan acomodacion.

Algo cu a resalta e prome dia tabata e hecho cu hopi di e turistanan cu a bin Aruba tabata 1st timers, kiermen turistanan cu ta bin Aruba pa prome biaha, y hopi di nan tabata famianan relativamente jong, algo cu por ta positivo mirando cu estadisticanan mundial ta mustra cu e grupo di riesgo ta personanan riba 60 aña bay ariba.

Considerando cu ta trata di bishitantenan mas hoben, si den caso cu resulta cu e turistanan aki tin covid, nan no lo pone un presion adicional riba capacidad di cuido medico.

 

- Advertisement -

DUNA COMENTARIO

Please enter your comment!
Please enter your name here