Home Salud Diabierna por lo menos 153 turista a haci un Covid test na...

Diabierna por lo menos 153 turista a haci un Covid test na Aruba

100
0
SHARE
- Advertisement -

Sharline Koolman di DVG

ORANJESTAD (AAN): Diabierna durante conferencia di Gobierno, señora Sharline Koolman di DVG a duna un update y splicacion riba henter e proceso di yegada di turistanan na aeropuerto.

Señora Koolman a indica cu e reapertura di frontera cu Merca a trece hopi emocion entre esnan presente y di parti di Departamento di Salud Publico tambe.

Empleadonan di DVG a purba di traha mas tanto cu tabata posible. Mas cu claro semper tin cos cu por bay fout, pero ta purba di ahusta y duna mihor servicio posible. Tabatin suficiente personal y nan a asisti e turistanan cu a yega.

E prome vuelo cu a yega tabata 1:10 di merdia for di Newark di United cu 122 pasahero. Pa 1:30 tabata un vuelo di American cu 125 pasahero for di Charlotte. Pa 1:54 a atende yegada di vuelo di jetBlue cu 119 pasahero procedente di Boston.

Pa 2’or tabata yegada di vuelo di American Airlines for di Miami cu 143 pasahero, y pa 4:10 di atardi otro vuelo di jetBlue for di New York cu 124 pasahero, pa un total di 633 pasahero for di Merca so. Mester tene na cuenta cu e cifra aki ta uno grandi pa DVG mirando cu nan mester percura pa tur e personanan aki.

Pa loke ta trata test, un total di 153 turista mester a haci e test na Aruba, mayoria a test caba y a upload esaki den e sistema. Algo cu nan tabata desea, pasobra si nan ta bin for di areanan conoci como ‘high risk’, ta preferible pa nan upload e test prome cu nan viaha y asina evita cu ora nan yega Aruba, nan ta bay perde nan vakantie pasobra nan ta malo y cu un turista malo por pone presion riba sistema di cuido.

Señora Koolman a bisa cu ayeramainta e tabatin un reunion cu Hulanda y e otro 5 islanan y nan a desea Aruba hopi exito den dianan di reapertura. Nan lo tuma Aruba como ehempel riba kico ta posible y e mihor manera pa haci esaki.

Comentarionan cu nan a haya tabata den gran parti positivo, y semper tin cualkier keho pero nan lo sigui cu nan esfuerzonan pa brinda e mihor servicio posible.

Di e 153 test cu a tuma lugar diabierna, diasabra mainta e resultadonan lo ta cla y disponible riba e app cu nan mester a download.

Mester recorda cu e app aki tambe ta pa localnan cu ta bay viaha, y asina ora bo bin bek Aruba, bo por haya bo resultado mas lihe cu ta posible. Diasabra nan lo tin un mihor bista si tur caso cu a drenta tabata negativo of no.

- Advertisement -

DUNA COMENTARIO

Please enter your comment!
Please enter your name here