Home Cultura Conchi, e storia di exito y reto pa Parke Nacional Arikok

Conchi, e storia di exito y reto pa Parke Nacional Arikok

298
0
SHARE
- Advertisement -

Mester sigura sobrevivencia di Natural Pool:

’Corda bishita Conchi,” ta un di e consehonan mas comun cu turistanan ta duna otro riba TripAdvisor, ora cu hende puntra kico tin pa haci na Aruba.

E propaganda aki y e karakter unico di e rikesa natural ta haci cu Conchi ta un di e atraccionnan mas popular di nos isla, particulamente den Parke Nacional Arikok, PNA. Alabes, e ta un di e retonan mas grandi cu e entidad encarga cu maneho di e parke, esta Fundacion Parke Nacional Arikok, FPNA ta confrontra cu ne.

Conchi, of Natural Pool manera e ta conoci memey di turistanan, cu su nomber historico ‘Cura di Turtuga’ ta berdad un di e hoyanan mas valioso di PNA. E ta e motibo pakico hopi ta bishita e reserva natural, pero lamentablemente tambe ta esun cu ta core mas peliger.

Conchi ta keda na e noordkust di PNA, y ta forma parti di un ambiente rico di formacion di piedra y matanan cu ta crece abou, cu apesar di condicionnan fuerte ta sostene bida.

E pool natural ta keda entre barancanan, cu ta proteha e conchi contra lama bruto y olanan fuerte. Esaki a produci crecemento di coral y un cantidad di bida marino cu a logra florece den e area unico, pero relativamente chikito aki. E nomber Cura di Turtuga mes ta indica con turtuganan tabata uza e conchi antes.

E ubicacion di Conchi ta rondona pa e terenonan mas bruto di Aruba. Pues si un hende kier yega Conchi, e mester sea bay na pia, bay riba cabay, cu jeep, ATV of UTV. E ciclistanan fuerte ta yega cu nan mountainbike.

E cantidad di tour cu turista a cuminza crece, segun e popularidad di Conchi a aumenta. Ranger Rambo Flanegin a nota cu riba un dia normal, esaki prome cu a sera PNA como consequencia di e pandemia di Covid-19, como 60 hende ta den e pool pareu, mientras cu tin un cantidad ta para den rij ta warda pa drenta.

E no ta durf bisa exactamente cuanto hende ta bishita Conchi diariamente, “pero mi ta kere e cifra di 500 bishitante pa dia ta uno hopi conservativo,” segun e.

Flanegin, cu tin 21 aña trahando como ranger, a experiencia di cerca e explosion den interes pa Conchi. El a mira un aumento exponencial di companianan di tour, cu ta uza Jeep grandi, UTV y ATV. “Den e prome añanan, esnan encarga cu e guia di tournan di ATV y UTV, tabata tuma nan tempo pa hiba nan clientenan na Conchi.

E ta un ruta exigente y dificil. Hendenan tabata mantene nan mes tambe na e velocidad maximo di 20 kilometer pa ora.” Pero segun e companianan a aumenta y crece, tambe nan a cuminza ofrece mas atraccion den e tournan. Consequencia di esaki ta cu e tempo pa por goza di un atraccion tambe a baha. E caravananan tabatin pura.

“E turistanan tabata haya poco tempo pa por landa un rato den e pool natural, despues ta cuenta di core bay mesora pa por mantene na e orario stipula di e tour.”

E conflicto pa bishita mas tanto atraccion den un solo tour y e responsabilidad pa mantencion di PNA a keda exponi, particularmente ora cu mester a sera e parke pa Covid-19.

 

E reto pa FPNA, responsable pa maneha e area natural, ta pa logra e obhetivonan primario di proteccion di naturalesa y recreacion sostenibel. FPNA a monitor  e efectonan ambiental di e uzo di vehiculonan motoriza den e area completo di e parke. Y ta bisa cu e paro temporal di turistanan, pa motibo di e crisis di Covid-19, a duna oportunidad pa evalua e resultadonan di bishitanan no-regula na Conchi.

 

Pues, e monitoreo no tabata solamente riba e area en cuestion, pero tambe e impacto di e bishitanan no-regula riba henter e ruta cu ta yega na Conchi. Asina por a constata morto di animalnan, ampliacion di caminda, sushedad y erosion y tur ta den contraste directo cu e obhetivo pa mantene naturalesa. E area por mustra bruto y seco, pero hecho ta cu noordkust di Aruba tin vegegacion cu ta crece hopi abou y tin un ambiente cu ta duna cas y bida na cangreunan chikito, lagadishi y otro faune, inclusivo parhanan local y migrante. Nan existencia ta bay man den man cu proteccion di nan area di biba.

 

Noodkust di Aruba ta un desierto, y manera tur desierto, e ta sostene un diversidad na mata y animal cu a desaroya resistencia y metodonan pa sobrevivi temperaturanan extremo y secura. Pa evita e calor pisa, hopi di e mammalnan chikito ta activo den oranan di anochi y ta biba den holnan durante dia pa evita solo. E holnan aki ta preveni cu nan ta expone nan mes na elementonan, y ta mantene un temperatura ideal pa e animal por sobrevivi.  Ecologia di desierto ta karakterisa pa tera seco y alcalino, un produccion abou, pero patronchi di comemento oportuno di parti di esnan cu ta come mata y hasta carnivoronan. Na Aruba por pensa riba e Warawara y otro parha cu ta come carni. Den otro palabra, e area desola y rico na geologia di e noordkust den PNA ta sostene un ecosistema rico pero vulnerabel.

 

E acumulacion di stof cu trafico motoriza ta lanta, cu ta cubri e vegetacion, zonidonan extremo (un UTV cu ta core duro por yega na un zonido di mas di 100 decibel cu ta uno hopi halto pa naturalesa) y erosion door di hopi actividad di trafico, ta nifica cu conservacion di PNA ta bou presion. Es mas, FPNA a ripara cambio di comportacion den e bida di animal, unda a bandona habitat, manera areanan pa descansa, pone neishi, y unda ta come.

 

E uzo diario di e pool natural door di algun cien hende pa dia, tambe tabatin un efecto devastado riba e habitat natural. FPNA den su ultimo nota di maneho a constata cu e acceso no-regula di bishitante pa Conchi a conduci na sobrepopulacion den Natural Pool. Esaki por crea situacionnan hopi peligroso pa e propio bishitante, kita di e experiencia, y causa un impacto negativo pa e ambiente di bida den e awa. De facto, como 90 porciento di e bida marino den Conchi ta hopi afecta. Natural Pool pa añanan tabata exponi na productonan contra solo, flippers y zapato di hende cu ta bay snorkel eyden y ta trapa y daña e coralnan y finalmente e calidad di bida den Conchi.

 

E intencionnan di FPNA ta pa garantisa cu e ta cumpli su mision di proteha PNA y su rikesanan natural. Y e ciere inespera a consequencia di un crisis mundial a duna bista kico por pasa ora cu ta duna un habitat e tempo y espacio pa recupera su mes. Ya caba por a constata presencia di fauna unico den PNA.

 

Pa Rambo, esaki ta bon noticia. E plannan pa amplia e cantidad di ruta di canamento, e recuperacion di areanan sobrepopula, unicamente lo yuda eleva experiencia di esnan cu ta bishita parke. “Y mi tin hopi bishitantante cu ta bolbe regularmente, cu cada biaha ta anticipa pasa mas tempo den explora y asina goza mas tanto di locual Parke Nacional Arikok ta brinda.”

- Advertisement -

DUNA COMENTARIO

Please enter your comment!
Please enter your name here