Home General Con votado di Aruba por controla entidad gubernamental nobo?

Con votado di Aruba por controla entidad gubernamental nobo?

124
0
SHARE
- Advertisement -

Ley no ta permiti Reino uza un malesa pa duna un prestamo

*Pakico Reino no a reenforsa poder di organonan di estado?

*Reino no ta ofrece un plan di gobernacion pero un plan di poder

ORANJESTAD (AAN):  For di prome momento cu e documentonan cu a wordo presenta dor di Reino siman pasa a bira publico Diabierna, DIARIO a cuminsa cu su analisis di tur aspecto.

Awe ta cu ley den man y basa riba nos realidad estatal, DIARIO ta analisa y presenta e proposicion Hulandes cu a causa un crisis den Reino.

Na un forma emocional a bini reaccionnan cu ta deshaci di e preguntanan cu mester wordo haci na un pais cu tin un cuadro legal y den cual Statuut ta splica bon cla e momento y e forma cu Reino Hulandes por interveni.

Pa deshaci di e proceso democratico di un pais, mester di un plan di gobernacion den cual ta splica pueblo exactamente kico ta bay pasa den un tempo defini.

Nos no por mira esaki, sigur si no tene na consideracion cu Aruba a tene su mes na e mandato di supervision di Reino a base di CAFT, manera Reino mes ta admiti. Esaki nos kier laga un rato pa otro articulo den e edicion di awe pa nos por atende solamente den e analisis aki, cu e base democratico di loke ta pasa na Aruba.

Emocion sigur no mester hunga e prome papel na un pais cu actualmente a wordo dividi entre gruponan cu ta varia di referendum pa cay directamente bou di Hulanda pa e otro extremo di bandona Reino.

Pa cuminsa e democracia cu DIARIO ta sostene, no ta permiti ni DIARIO, ni gobierno di Aruba of di Reino, pa dicidi den ningun direccion cu no ta a base di loke ley ta bisa.

DIARIO ta tene duro na e Orden di Ley cu ta goberna un pais democratico y cu no ta permiti introduccion di un organo gubernamental nobo sin cu pueblo a wordo bon informa y cu gremionan por y tur instancia oficial di Aruba por haya e contenido cu ley ta duna nan.

Reino ta introduci un entidad gubernamental nobo. Reino no ta papia di un entidad di supervision manera CAFT y den cuadro di Statuut y constitucion democratico. Reino ta papia di un entidad gubernamental. Punto. Ora papia di goberna, den nos sistema nos conoce Parlamento, Gobierno y Husticia na Aruba.

E entidad gubernamental aki, cu Reino ta introduci, ta deshaci di e decision di pueblo di Aruba pero tambe di e sistema cu ta controla e funcionamento di nos sistema.

Pakico Reino no a introduci un sistema cu ta bay carga nos organonan mas halto di estado? Aki e fayo grandi ta sinta.

Nos tin un Algemene Rekenkamer Aruba, un Raad van Advies y un Conseho Social Economico. Nan a haci nan trabou. Nan a cumpli cu nan control.

Nan a mustra kico a bay robes y kico mester pasa.

Pakico Gobierno no ta exigi tur e gobiernonan actual pa sostene e organonan aki cu castigo pa tur cu viola nan?

Pasobra esaki ta loke a haci falta. Tur e organonan aki a mustra Parlamento y Gobierno kico lo pasa cu Aruba si nan sigui cu loke nan ta haci.

E organonan aki a bay contra reduccion di BBO sin un forma nobo di entrada. Nan a presenta na Parlamento e Fondo di 1.6 Biyon. Nan a haci nan trabou.

Kende ta bay controla e entidad cu Hulanda kier impone pa dirigi Aruba sin eleccion y tuma decision sin cu a splica pueblo bon kico ta bay pasa?

Con DIARIO por splica pueblo den un edicion kico Hulanda ta pretende actualmente?

Awe Aruba mester deshaci di emocion pa a base di ley rechasa kico ta bay pasa.

Aruba mester bira un solo pueblo pa defende su sistema democratico.

Statuut no ta permiti Reino uza un malesa pa duna Aruba un prestamo. Reino mester actua den cuadro di e Orden di Ley cu ta exigi pa e entidad nobo di gobernacion por wordo controla y ta acepta dor di Pueblo di Aruba cu no a vota ningun momento pa un entidad nobo di gobernacion cu poder absoluto! 

- Advertisement -

DUNA COMENTARIO

Please enter your comment!
Please enter your name here