Home General Ciudadanonan mayor di 70 aña sin seguro Covid-19

Ciudadanonan mayor di 70 aña sin seguro Covid-19

207
0
SHARE
- Advertisement -

Personanan activo riba diferente tereno internacional no por biaha

*Adaptacion edad minimo pensioen di behes ta confirma problema

*Grupo creciente cu problema pa mantene actividad internacional 

ORANJESTAD (AAN) — For di momento cu e coronavirus a bati na porta, problemanan a cuminsa presenta riba tereno di seguro.

A resulta cu hopi compania di seguro no ta cubri e resultadonan di e coronavirus. Un problema cu tabata tin efecto directo riba turismo ora na prome instancia, a presenta problemanan pa cobertura di e seguro di biahe pa casonan cu presenta durante vacacion.

Seguro medico a bira un demanda internacional pa paisnan permiti entrada di biaheronan cu no solamente ta turista pero tambe personanan cu mester participa na eventonan internacional of atende asuntonan a base di nan bida priva, profesional of di negoshi.

Despues cu medidanan relaciona cu e pandemia di Covid-19 a interumpi actividadnan social, ciudadanonan Arubano awor lo ta den un problema grandi.

Informacion cu DIARIO a ricibi ta indica cu personanan cu alcansa edad di 70 aña, no por cera un seguro medico contra e menasa di e coronavirus nobo na Aruba.

Segun cifranan compila pa instancianan oficial mundial riba tereno di pandemia, e posibilidad pa wordo afecta dor di e coronavirus nobo, ta subi cu edad.  Segun e cifranan, e grupo di edad mas halto pa wordo infecta cu e coronavirus nobo, ta e grupo di persona cu ya a cumpli 80 aña.

E grupo aki ta wordo sigui pa  grupo di persona cu a pasa 70 aña di edad.  

DIARIO a atende e asunto aki cu informantenan cu ta mustra cu e mundo di seguro tin como punto di salida pa elimina riesgo.

Debi na e cifranan compila di e coronavirus nobo, cu por sigui cambia y demostra aumento den e gruponan mas hoben, companianan di seguro por lo general no ta honra e seguro contra resultadonan medico di e coronavirus nobo pa personanan riba 70 aña.

Informantenan den mundo medico a indica na DIARIO, cu ta logico cu e chens pa haya e enfermedad ta mas grandi mientras edad ta subi. E coronavirus nobo ta afecta hende cu problemanan di salud na prome luga.

Mas halto edad di hende, mas chens cu e persona tin un enfermedad cu ta duna hende mas chens pa infeccion cu Covid-19.

E situacion cu a wordo crea ta wordo discuti na hopi nivel. E aumento di edad na cual hende ta participa na actividad economico y laboral productivo, a haci cu a subi edad di pensioen di behes rond mundo. Na Aruba e edad minimo pa pensioen di behes ta subi pa 67 aña.

Den hopi caso pensionadonan ta keda activo pa basta aña y ta desplega actividadnan internacional.

Kico lo pasa cu e Arubianonan cu pa nan actividadnan mester biaha pa exterior? e problema pa haya un seguro contra e coronavirus nobo, ta haci cu ciudadanonan mayor di 70 aña no por biaha mas y nan bida normal lo wordo completamente paralisa.

Informacionnan di DIARIO ta indica cu Aruba no ta so den e problema. Covid-19 a presenta su mes na momento cu traspaso hopi importante pa un generacion nobo ta tuma luga riba tereno financiero y economico.

E coronavirus no a duna hende oportunidad pa regla asuntonan prome cu medidanan mester a wordo tuma.

DIARIO ta sigui atende e problema aki den e dianan venidero ya cu por spera problema serio pa un grupo grandi di persona.

 

 

 

 

 

- Advertisement -

DUNA COMENTARIO

Please enter your comment!
Please enter your name here