Home Hudicial Cinco aña di prison pa homber cu a haci asalto arma na...

Cinco aña di prison pa homber cu a haci asalto arma na dos supermercado

120
0
SHARE
- Advertisement -

ORANJESTAD (AAN): E homber di inicial E.T. a scucha Hues confirma e exigencia di Fiscal, esta 5 aña di prison pa dos asalto arma cu violencia cu el a haci. E.T. a bisa Hues cu e tabata bou influencia di droga. Hues a reacciona cu, ta bou di influencia di droga no ta un excusa.   

ACUSACIONNAN:

   E acusacionnan cu Fiscal a presenta den sala di Corte contra E.T. ta:

   (*) Dia 14 Maart 2020 a haci asalto arma cu cuchiu na supermercado Chines. A tene e dama Chines duro y grite na forma amenazante y saca cuchiu pe.

  (*) Dia 15 April 2020 a haci un otro asalto arma cu cuchiu na un otro supermercado Chines. Cu cara tapa a drenta e supermercado y pone obheto skerpi na garganta di e doño y a tir’e abao. 

  ASALTO:

   Ta asina cu E.T. a admiti den Corte. Hues a mustra cu segun e relato di Polis, un mucha muher Chines (16) a declara na Polis cu dia 14 Maart 2020, e tabata tras caha di nan supermercado, mientras cu su tata tabata cushina. El a mira un homber drenta y a pidi pa un sigaria los, habon y deodorante.

   Na dado momento e homber a bisa cu e ta bay puntra su casa cu ta den auto. El a sali for di e supermercado y bolbe. El a bay coy algun cos pone riba e toonbank. El a pasa rond di e toonbank y a gara e mucha y tapa su boca cu su man y bise habri caha. Ora Chines a habri caha, el a coy placanan.

   Segun e mucha, e homber tabatin un cuchiu den su boca. E Chines a coy e cuchiu y e ora ey e homber a sali. E homber a bay cu algo mas di 100 Florin. Despues un homber cu tabata den e supermercado a bisa e mucha Chines cu e homber ta E.T. Ta asina cu E.T. ta un adicto na base y pesey a bay horta pa haya placa pa sigui cumpra droga.

   E.T. a desmenti cu e tabatin cuchiu den su boca. El a bisa Hues cu e ta cana tur ora cu un cuchiu den saco carson. Door di luchamento e cuchiu a cay for di su carson. Segun E.T. e no a bay coy nada otro den e supermercado. El a desmenti cu el a pasa tras di e caha y no a coy placa. El a bisa cu e 35 Florin cu el a pone riba e toonbank el a coy back.

   Hues a mustra cu na Polis, E.T. a bisa cu el a bay busca e cuchiu den pick up. Ora el a lucha cu e mucha Chines el a laga e cuchiu cay y laga esaki riba vloer. El a coy 35 Florin for di e caha y bay cun’e. El a bay cumpra droga y despues a bay cas. E.T. a bisa Hues cu e momento ey e tabata bao influencia di droga y alcohol.

Dia 15 April 2020, un dama tras di caha di un supermercado Chines, a sinti hende gar’e duro na su nek y tapa su boca.

   El a sinti algo skerpi na su garganta. E tabatin miedo cu e ta worde hinca. E persona a coy tur e placanan di papel for di e caha. Despues a bent’e abao y a core bay. Banda di e vloer el a mira un cuchiu benta. E dama ta calcula mas o menos 500 Florin e asaltante E.T. a bay cun’e.

    Tabatin un cliente den supermercado y a mira tur cos. Segun E.T. e no a pone cuchiu na garganta di e dama. El a bisa cu e tabatin e cuchiu cun’e pero no a us’e. Hues a bisa cu e testigo a bisa cu el a mira E.T. ta tene e dama cu un man y e otro man e tabata haci otro cos. E no sa si ta un cuchiu. Hues a confronta E.T. cu imagennan di video cu Polis a mira caminda ta mira claramente E.T. cu un cuchiu den man. Tambe nan ta mira cu E.T. a coy cantidad di papel di Florin. 

 EXIGENCIA DI FISCAL:

   Fiscal a bisa cu e no tin motibo pa duda loke e victimanan ta conta. For di un caso por mira E.T. riba camera cu cuchiu. Si mira con el a actua den e supermercado, Fiscal no tin duda cu E.T. a haci mesun cos den e otro supermercado.

   Den tur asalto E.T. tabatin cuchiu. Den e promer supermercado a asalta un mucha muher di 16 aña. Esaki ta hopi traumatico pa e mucha y e otro dama. Fiscal a exigi 5 aña di prison, kitando e tempo cu E.T. ta sera den KIA.

   DEFENSA:

   Abogado mr. Maldonado a bisa Hues cu E.T. a admiti di a haci e asaltonan. El a mustra cu e declaracion di e mucha den e supermercado no ta cuadra. Con por ta cu e mucha ta bisa cu E.T. tin’e cu mannan na boca y tin un cuchiu den man. E.T. ta un adicto y tabatin cita na Maart 2020 pa rehabilita pero a cay sera.

   Su señora sa di e problema y e tabata busca forma pa yuda E.T. El a pidi Hues pa tene cuenta cu E.T. ta esun cu ta percura pa su famia. E.T. a bisa cu door di Corona Virus el a actua asina. El a pidi pa e traha pa paga su castigo.

   SENTENCIA:

   Hues a sera tratamento di e caso y a dicta sentencia di biaha. Hues a bisa cu e ta haya legalmente proba cu E.T. a haci e asaltonan arma. Esakinan ta casonan serio. Na opinion di Hues, den supermercado hendenan mester sinti nan mes sigur. Aruba mester keda sigur.

   El a remarca cu usamento di droga no ta un excusa. E victimanan ta keda traumatisa pa loke nan a pasa aden. Hues a bisa cu no ta tolera atraco of asalto na Aruba. Turistanan mester ta sinti nan mes sigur. Pa cu e castigo, Hues a bisa cu e ta haya e exigencia di Fiscal na su lugar.

   El a mustra cu normal pa un atraco ta duna 4 aña di prison. Hues a reacciona tambe ariba e ponencia cu ta door di Corona Virus, E.T. a actua asina. Hues a bisa E.T., no culpa Coronavirus sino E.T. su adiccion. E.T. a cuminsa discuti cu Hues y Hues a dicta sentencia cla y raspa, 5 aña di prison

.

- Advertisement -

DUNA COMENTARIO

Please enter your comment!
Please enter your name here