Home Cultura Casita Geel ta haya un destinacion nobo y lo ta conoci como...

Casita Geel ta haya un destinacion nobo y lo ta conoci como ‘Patio 15’

133
0
SHARE
- Advertisement -

ORANJESTAD (AAN): E  monumento na Weststraat 15 conoci den boca di pueblo manera: Casita Geel, Museo Numismatico, Aruba Bank huisje of Arina, entrante awe lo conoce un destinacion nobo bao di e nomber Patio 15.

   Esaki ta e cas geel cu tin net patras di Parada di Bus grandi na Playa.

   Riba Diabierna 3 di juli Stichting Monumentenfonds Aruba, durante e presentacion di e proyecto Patio 15,  a firma un acuerdo di huur cu Experitours cu entrante e fecha aki lo haci uzo di e casita Geel.

   Na final di 2019 despues cu e contract a caba cu e ultimo usuarionan SMFA a cuminsa cu e buskeda pa un huurdo nobo. Despues di a haya diferente interesadonan a duna nan e oportunidad pa entrega e propuesta di nan proyecto pa asina SMFA por a dicidi cual proyecto ta mas apto pa e edificio teniendo na cuenta entre otro e status di monumento proteha.    Na final a logra yega na un acuerdo cu Experitours cual lo tin un proyecto dirigi riba turista y localnan y cu ta haci cu e bishitantenan lo por adimira e bunita monumento aki di paden tambe. 

  Den e proximo siman lo tin un destaho publico pa asina haci e adaptacionnan y trabounan di mantencion necesario.

   Casita Geel ta  un cas di cunucu construi na aña 1908 na crusada di Caya Betico Croes y Waterweg, pega cu e actual edificio di Aruba Bank.

   Probablemente e parti central di e cas a ser construi na 1860 pa un Frances y na 1908 a wordo cumpra pa Sr. Richard Johan Eman van der Biest. Kende tabata casa cu Catharina van der Biest-Oduber.

   Di e matrimonio aki a nace seis yiu cual tur seis a lanta den e cas aki. Un di e yiunan Frederica van der Biest- Eman a casa cu John Gerard Eman, fundador di e prome instituto financiero di Aruba, Aruba Bank. For di aña 1999 e cas a keda inhabita y no a ser uza mas.

   Na aña 2000 cu e meta pa preserva e casita aki pa futuro generacionnan y evita e bay perdi a dicidi pa muda esaki pa un locacion nobo na Weststraat. Pa aloca e edificio a busca un tereno den Oranjestad mes paso akinan ta caminda cu e cas di cunucu mester a keda mirando cu ta den e area aki so por a haya e tipo di casnan aki.
   
   Un otro punto importante tabata cu mester a haya un tereno caminda por a aloca e cas mescos cu na su tereno original na un distancia di 14 meter for di e rooilijn esaki ta ser considera un locacion historico.

   Asina a logra yega na e tereno aki caminda e edificio ta actualmente despues cu e tereno a keda traspasa pa Stichting Monumentenfonds Aruba. Esaki ta e unico biaha cu na Aruba a muda un monumento completamente.
  
   SMFA ta desea Experitours hopi exito cu e proyecto di Patio 15. Hunto nos lo preserva nos historia pa futuro!

 

- Advertisement -

DUNA COMENTARIO

Please enter your comment!
Please enter your name here