Caos na hospital ta rementa y bira urgencia nacional!

    5636
    0
    SHARE
    - Advertisement -

    Uno di e proyectonan mas caro di gobierno anterior ta menasa pa bida

    *Autoridad Financiero di Aruba mester investiga y denuncia proyecto

    *Alarma cu DIARIO a bati ayera ta haya confirmacion di tur banda

    ORANJESTAD(AAN)–Ayera, na inicio di e siman cu Aruba mester habri porta pa turismo for di Merca, DIARIO a bati alarma grandi pa mustra cu Aruba no ta prepara pa ricibi turistanan ainda na un forma responsabel debi na e situacion di e hospital di Aruba.

    Reaccionnan cu DIARIO a ricibi ayera di tur sector envolvi den cuido medico, a confirma e peligro grandi cu tin na e hospital di Aruba y ta exigi pa e autoridad financiero di Aruba cu ta Algemene Rekenkamer Aruba, cuminsa cu un investigacion separa di e proyecto Hospital Nobo, cu tabata parti di e fondo di 1.6 Biyon di Bo Aruba.

    “Aparentemente autoridad hudicial no ta considera necesario pa investiga e proyectonan di Bo Aruba, di cual e hospital ta forma parti. Algemene Rekenkamer Aruba na e momentonan aki mester investiga desaroyonan cu a tuma luga na e hospital di Aruba for di momento cu el a termina e rapport alarmante riba e proyectonan di Bo Aruba,” informantenan a bisa ayera.

    Tur sector cu ta atende cu e Hospital di Aruba ta biba cu un preocupacion enorme pa e situacion desastroso y caotico di e hospital, cu mester tabata destina na e causa di scapa bida di hende y no pone bida di hende na peligro manera ta e caso.

    Informantenan a pidi DIARIO presenta e impresion cu hende ta haya ora yega e hospital den e crisis di e coronavirus nobo cu ta menasa bida di hende.

    Nan a mustra cu dies aña pasa,  Gobierno Mike Eman a firma na nomber di pueblo di Aruba un acuerdo cu e fundacion SOGA y e fundacion di hospital SVA, pa realisacion di e proyecto cu mester a encera un suma di 283 Miyon Florin.

    “Tabata trata di e di dos proyecto mas caro di e proyecto total di Bo Aruba, cu tabata basa riba e fondo di 1.6 Biyon di pueblo di Aruba. A proyecta 283 Miyon Florin pero manera autoridad financiero mes a mustra na 2017 e suma final ya tabata wordo calcula na 653 Miyon cu pueblo di Aruba lo mester a paga,” manera informantenan clave ta mustra.

    Nan ta insisti riba e wega di circulacion di placa entre fundacionnan di gobierno y gobierno mes riba cual e proyecto di gobierno anterior tabata basa.

    “Awe despues di casi Dies aña cu a firma e acuerdo pa e hospital, e berdad ta rementa den un situacion caotico cu ta un problema grandi pa Aruba habri porta pa turismo den e situacion di Covid-19,” informantenan ta splica.

    Nan ta confirma asina e informacion di DIARIO ayera cu Aruba por haya su mes den problema serio si turistanan cu mester bini Aruba den un crisis mundial di salud, mester haci uzo di hospital cu ta un caos y un peligro pa bida di hende.

    E cantidad di operacion cu por haci actualmente na e hospital ta limita. Caos ta presente te den Cuido Intensivo, manera a wordo confirma na DIARIO.

    Informantenan clave cu a guia DIARIO den su investigacionnan cu awor ta haya sosten di tur banda ta indica, cu e situacion na hospital di Aruba ta peligroso pa pashentnan, sigur si tene na consideracion e peliger di presencia di asbest.

    DIARIO a wordo informa cu por spera mas accion riba e tereno aki den e proximo dianan pasobra ta salud di hende ta na peliger ya cu hospital no por cumpli cu su tarea debidamente.

    “Parlamento tin e deber pa habri un encuesta riba hospital si autoridad hudicial no cuminsa investiga kico a pasa cu placa di pueblo den e proyecto hospital cu gobierno Mike Eman a introduci como proyecto di cinco strea,” a wordo splica.

    Algemene Rekenkamer Aruba como autoridad financiero di Aruba mester bini cu un rapport nobo pa splica con ta atende cu fracasonan pa cual mester tene contratistanan responsabel.

    “Ora habri porta pa turismo mester tene na consideracion cu de situacion na hospital,”informantenan ta indica confirmando cu pa mundo medico na Aruba ya e situacion na hospital a rementa pa bira urgencia nacional!

    Manera a wordo mustra, e aspecto di e hospital di Aruba ya ta splica kico por spera den e hospital cu for di e momento cu el a habri su portanan, ta un desastre!

    - Advertisement -

    DUNA COMENTARIO

    Please enter your comment!
    Please enter your name here