Home Politica Benny Nisbet mustrando cu un Gemeente Hulandes pa Aruba ta un locura...

Benny Nisbet mustrando cu un Gemeente Hulandes pa Aruba ta un locura di otro mundo

382
0
SHARE
- Advertisement -

ORANJESTAD (AAN): Segun Benny Nisbet di Partido PPA, ta bisto cu esnan cu ta defende e asina yama ‘gemeente/municipio’ hulandes na luga di nos Status Aparte cu ta significa un pais autonomo den Reino Hulandes, NO a haci nan ‘huiswerk’ y ta dispuesto pa ta entreguista di Status Aparte. 

   E grupo no a presenta ningun argumento, pues nada di loke ta e beneficionan pa Aruba bira un ‘gemeente’ den Reino Hulandes!  Di esaki net net nada ta worde bisa!

   E grupo ta djis bisa cu den 34 aña tabatin hopi corupcion den gobierno y cu e generacion di politiconan ey a regla cos pa nan mes cu awe mayoria ex-politico lo tin pensiunnan politico miyonario.

   Segun Nisbet, PPA ta di opinion cu un debate riba un ‘gemeente’ versus nos Status Aparte mester por bay den mucho mas profundidad cu e argumentonan fofo cu ta zona manera un cantica cu e vocero mester a ‘train’ riba instruccion di esnan tras di cortina.   PPA kier a señala algun punto importante:

(A) E fundacion di nos Status Aparte ta regla den nos Constitucion.

(B) E fundacion di posibel ‘gemeente/municipio hulandes’ ta regla den e Grondwet Hulandes den Capitulo 7 articulo 123 pa 136.

   Interesante  pa PPA   a  resulta formulacion di  articulo 123, y Nisbet a cita:

(1) Bij de wet kunnen provincies en gemeenten worden opgeheven en nieuwe worden ingesteld.

(2) De Wet regelt de wijziging van provinciale en gemeentelijke grenzen.

   Loke esey nifica:

   Actualmente e Constitucion di Aruba ta duna e poder ‘autonomo’ na tanto  nos gobierno como parlamento di Aruba cu ta encarga cu leynan nacional (Landsverordening, etc).

   Existencia di e pais Aruba  ta completamente den nos man.  Nos derecho di autodeterminacion ta ancra den Statuut si acaso pueblo dicidi otro.

   Pa Hulanda, e ‘gemeente’ su existencia ta completamente den man di e instancianan cu ta traha ley na Hulanda esta na prome luga Gobierno Hulandes combina cu Staten Generaal (1e y 2e Kamer).

   Hulanda te cu un  150 aña pasa a conoce 1.700 gemeente cual den curso di tempo comienzo di siglo pasa a worde baha na 1.100 gemeente y desde 2019 Hulanda conoce solamente 355 gemeente.

   Esaki pasobra Gobierno/Staten Generaal situa na Den Haag a sinti necesidad pa cambia esaki y pone un of mas gemeente cay bao di otro.  Esaki ta nifica cu nada lo NO stroba Hulanda den futuro si Aruba  comete un eror historico pa asumi e posicion di ‘gemeente hulandes’ pa trece cambio den esaki hasta cambia e nomber di Aruba si  politiek Den Haag desea esaki y eventualmente pone e gemeente Aruba cay bow di un ‘provincie’ den Caribe!

    Esnan cu por ta sigui e discussion aki por a tende of lesa e pregunta: ‘Pakico no ta pone tur Isla bao di un Provincie Hulandes cu lo ta simplemente un otro nomber of structura pa Antiyas Neerlandes.  Esaki pueblo di Aruba lo no mag permiti!

   Na opinion di Nisbet, aparentemente sr. Atan Lee lo NO a ni studia esaki debidamente prome cu el a lanza e idea di un posibel gemeente.  Un locura di otro mundo.

   Bijzonder Gemeente:

   Cierto momento tambe Nisbet a tende Atan Lee cu e grito “Nos ta desea un bijzonder gemeente”.  E pregunta cerca varios hende ta:  Kico ta un Bijzonder gemeente?  Simplemente door di google, esaki bo ta ricibi e  splicacion: ‘Belangrijkste verschil met een normale gemeente is dat de 3 Eilanden NIET tot een provincie behoren’.  BES voert taken uit die in Europees Nederland bij de provincies liggen. En Rijksdienst Caribisch Nederland voert nationale taken uit op de 3 eilanden.

   Segun Nisbet, cu otro palabra e ponencia di Atan Lee cu esaki por worde negocia no ta cuadra cu berdad.  Como cu e BES-eilanden ta den Caribe y no na  Europa/Hulanda ta permiti cierto tarea keda pa worde ehecuta door e gemeente mes, mientras cu algun otro ta worde ehecuta pa e Rijksdienst Caribisch Nederland cu por worde expande cu tempo mientras e autonomia/competencianan di e  ‘bijzonder gemeente’  lo por bira menos y mas menos cu tempo.

   Awo cu durante 34 aña  cu pais Aruba apenas a conoce dos signatura di gobernacion (uno berde y uno geel), e isla aki no a logra crea un of mas pilar economico, y esey NO ta motibo pa entrega e logro di nos Status Aparte.

   Cu tin cierto tereno unda lo mester eleva e nivel di gobernacion, ta berdad, pero esey tampoco ta motibo pa entrega  nos Status Aparte.

   Aruba tin varios otro partido politico cu por resulta di ta prepara pa crea algun pilar economico  y eleva gobernacion riba nos isla cu resultado positivo pa nos pueblo, sigur partido PPA.

- Advertisement -

DUNA COMENTARIO

Please enter your comment!
Please enter your name here