Home Hudicial Awe tin sentencia pa homber sospecha di a abusa di tres mucha...

Awe tin sentencia pa homber sospecha di a abusa di tres mucha muher famia

146
0
SHARE
- Advertisement -

Fiscal a exigi 6 aña di prison

ORANJESTAD (AAN): Awe mainta e homber T., via video conference lo scucha e decision di Hues den e caso penal cu Fiscal a cuminsa contra dje. Algun siman pasa tratamento di e caso a tuma lugar den sala di Corte di Husticia di Aruba, caminda a scucha Fiscal exigi 6 aña di prison p’e.

Un Hues di Curacao a bin Aruba pa atende e caso ya cu e sospechoso lo ta famia di casa di un miembro di Corte di Husticia.

Algun siman pasa ora di tratamento di e caso, Hues a puntra T. di e acusacionnan y el a bisa cu e ta inocente. Hues a bisa cu tin algun persona ta bisa cu si T. a abusa.

Hues a mustra cu e dos muchanan a conta e mesun cos, esta cu durante un periodo largo den camber di T., unda nan tabata haci huiswerk, nan tabata wordo molestia. T. a bisa cu nan tabata uza su camber pa haci huiswerk y e tabata repasa e lesnan cu nan. Segun T. tin diferente mucha tabata haci huiswerk.

T. a desmenti categoricamente cu el a mishi cu e muchanan na nan partinan intimo. Hues a mustra cu un di e muchanan tin 8 y e otro 11 aña. Tin un otro mucha cu a bisa kico e sa y durante interogacion di Hues Comisario el a bisa cu e tambe a wordo abusa door di T.

T. ta keda para riba cu e no a haci nada. El a splica Hues cu e tin bon relacion cu tur e muchanan y nan famianan. Nunca el a pensa cu nan ta acus’e di algo asina. El a remarca, con por ta cu nan ta acus’e di algo asina y nan ta asina sera cun’e.

Hues a bisa cu a yega di acusa T. den pasado cu a abusa di mucha familiar pero e no a wordo persigui pasobra a resulta cu e tabata storia di mucha. Segun T., awor despues di 16 aña e ta compronde pakico a gaña riba dje. El a bisa cu su ex amiga a haci esaki door di rabia contra dje.

Hues a mustra cu e mama di e dos muchanan a bisa cu T. a abusa di e confia cu nan tabatin den dje y nan ta hayando tratamento di psicologo. Tin un di e muchanan a keda sinta door di esaki. Mama di dos di e muchanan a demanda 5 mil florin pasobra e no por a traha. E mama di e otro mucha a mustra cu e caso aki a afecta nan tambe y nan tambe ta siguiendo tratamento di psicologo. Tambe e mama ta demanda 5 mil florin.

Fiscal a bisa cu e muchanan tabata bay na nan oma, señora di T. pa asina haci huiswerk mientras cu nan mayornan tabata traha. Den camber di T. nan tabata haci huiswerk. T. ta wordo acusa di a abusa di e muchanan pa periodo largo, mas o menos 2 aña. Fiscal a mustra cu T. tabata sera e porta di e camber na yabi. E muchanan no tabata kier a bisa nada door di miedo. Despues di hopi insistencia, nan a cuminsa papia.

Ambos mucha a mira con T. tabata mishi cu nan y a penetra nan. Fiscal a bisa Hues cu e no ta haya legalmente penetracion sexual y ta pidi Hues pa declara T. liber di esaki. Pa loke ta e demandanan, e mamanan ta mustra cu e muchanan a keda traumatisa.

Fiscal a pidi Hues pa aproba e demandanan di daño y aplica e medida di pago. Pa cu e castigo, Fiscal a tene cuenta cu e muchanan a keda afecta. E ta haya cu T. a abusa di e confianza cu e muchanan tin den nan opa. El a tuma T. na malo pa esaki y a exigi 6 aña di prison.

Awe DIARIO ta informa lectornan kico tur Hues ta pensa di e caso y kico ta e sentencia.

- Advertisement -

DUNA COMENTARIO

Please enter your comment!
Please enter your name here