Aruba a conoce e manifestacion di mas grandi contra Abuso di Pedofil

    557
    0
    SHARE
    - Advertisement -

    ORANJESTAD (AAN): E grupo End Child Abuso y tambe grupo Ta Basta, sosteni pa diferente organizacion y fundacion local mas, a tene Diabierna atardi un manifestacion pacifico cu a cuminza prome pa 3:00 pm dilanti Corte di Husticia den Emanstraat na Playa.

       Di e forma aki tur hende cu ultimo luna a haya curashi y perseverancia pa bira activo y cuminza denuncia tur e hendenan cu ultimo añanan a haci maluso sexual di muchanan inocente.

       Aruba a cuminza lanta porfin for di soño!  E tabu di abuso di mucha den famia ta kibrando.  Pedofilnan scondi ta cuminza haya miedo.  E momento a yega pa esnan cu ta comete e fechorianan aki, realiza cu nan tin di busca ayudo profesional rapidamente.  Evita di daña bida di muchanan inocente.

       Mama y tatanan balente a aglomera di trempan caba, full bisti na preto pa asina demostra un simbolo di luto pa tur e victimanan di ultimo decadanan na Aruba.

       Hasta ex-Recherche di Kinder- en Zeden Politie, Shon Pe Krozendijk a mustra cu di hopi tempo caba e Codigo Penal di Aruba ta mustra castigo di 10 aña, 12 aña, y 15 aña pa esnan cu comete abuso sexual cu muchanan.  Pero loke ta pasa ta cu ora Huez impone sentencia, e ta considera e circunstancianan bao di cual e acto a socede.

       Famia mester cuminza na cas na educa nan yiunan di chikito caba pa siña nan cu ningun hende mag di bay mishi cu nan partinan priva, y si acaso esey socede, mesora bay bisa sea bo Mama, of bo Tata, of bo abuelonan.  Publico a duna Krozendijk un aplauso grandi aki.

       Varios victima di abuso sexual como mucha a haya chens di dirigi palabra y mustra con nan a haya e curashi diripiente riba social media pa saca e dolor di hopi aña for di nan curazon pa mustra cu e momento a yega pa Aruba den su totalidad condena e actonan aki.  Aruba ta pidi pa abuso di e Pedofilnan, stop awor mesora.

       Famianan di e dos muchanan Eugene y Rishandroh cu a ser mata na 2017, tambe a dirigi palabra.  Nan a mustra con e burdugonan Gabriel y e mama Risheila mester paga pa nan castigo.  Y publico a bira furioso, ora cu a divulga cu aparentemente e mama Risheila Frans a bolbe sali na estado (kizas ya a duna luz).  Esaki a pone algun hende grita, cu Voogdijraad mester actua pa kita e baby aki for di Risheila F., pasobra tin chens cu e lo bay mata e criatura ey tambe.

       Tabatin hopi hende cu pancarta, incluyendo potret di hopi persona cu lo tin di haber cu pedofilia.

       Despues di e manifestacion aki, e multitud a cana den un rij masha largo mes pasa den Hendrikstraat, Caya Betico Croes, y Oranjestraat pa asina yega na Parlamento.

     

    - Advertisement -

    DUNA COMENTARIO

    Please enter your comment!
    Please enter your name here