Home General Apertura di The Movies @ The Drive-In tabata yen ambiente

Apertura di The Movies @ The Drive-In tabata yen ambiente

114
0
SHARE
- Advertisement -

ORANJESTAD (AAN): Aruba su Drive-In a habri bek, y e tin un nomber completamente nobo.  Di awor en adelante e ta conoci como The Movies @ The Drive-In y ta conta cu un proyector completamente digital y moderno, y ta cla pa duna e generacion nobo di hobennan sinti e sabor di e alegria di mira un pelicula riba pantaya grandi sinta den bo auto.

   Relaciona cu nan reapertura, gerencia di The Movies @ The Drive-In a organiza un concierto cu e artista local Jeon.

   Special pa esaki, a traha un escenario basta halto net dilanti e pantaya grandi, pa asina Jeon y su artistanan invita por a presenta, incluyendo DJ Big Rig, Deejay T., Dr. Eli, y Steve Andreas.

   Nan a cobra solamente 35 Florin pa vehiculo, y e concierto a tuma lugar for di 6:30 pm te cu 10:00 pm.

   For di trempan caba, publico a cuminza aglomera pa drenta e lugar.  Pesey mes dado momento trafico a stagna hasta riba Green Corridor, y tambe di e caminda di Kibaima.

   E lugar a yena completamente, y siguiendo reglanan di distanciamento social, tur hende a wordo suplica pa keda den nan vehiculo.  Solamente 1 persona por baha y bay cumpra cos di come, of bo por a bay usa toilet.

   Como cu The Movies @ The Drive-In tin su propio frequencia riba FM, hendenan por a usa nan car-stereo tambe pa scucha e concierto.  Y en general por a nota cu publico a comporta nan mes na forma ehemplar, y e concierto a haya bon comentario.

  Na e actividad por a nota presencia di Eddie de Veer di The Movies, y demas dirigente di e.o. MetaCorp.  Tambe a nota presencia di varios empleado di e compania, cu sigur a bay eynan pa felicita nan hefe cu e logro aki.

   Tambe nan a keda satisfecho cu e trabao relampago cu contratista a haci pa asina The Movies @ The Drive-In.

    Jeon a sa di ofrece su cancionnan cu semper a laga publico den ambiente di canta hunto cune, y e berdadero showman di dje a wordo demostra e anochi aki.  Publico a goza un mundo cu su hitnan grandi, y tambe e recien lanza “Bobolongs”. 

   E cancion aki a sona asina bon eyden, te cu publico a cuminza balia den baki di pickup, riba dak di auto, y tambe riba hood di auto.  E cancion aki ta hopi pegahoso y tabatin sonido perfecto di Elite den The Movies @ The Drive-In.

   Jeon tabatin su cara tur na sudor, pero el a habri un botter di Alcolado Glacial pa splash na su nek, y mesora el a haya algo manera frescura di lama riba escenario.

   DIARIO a keda sumamente impresiona cu e show y concierto aki.  Tur hende a haya balor pa nan placa, y e sincronizacion di efectonan di luz, combina cu imagennan riba e pantaya grandi, tabata sumamente profesional.

   Tur ganashi di e evento di Diaranson anochi a bay pa yuda comunidad, incluyendo Fundacion Pa Nos Comunidad, como tambe Fundacion pa Hende Muher den Dificultad.

- Advertisement -

DUNA COMENTARIO

Please enter your comment!
Please enter your name here