Home Parlamento Abuso di mucha, ta ken su culpa? (parti 2)

Abuso di mucha, ta ken su culpa? (parti 2)

62
0
SHARE
- Advertisement -

Parlamentario Hendrik Tevreden (MEP):

Den relato parti 1 nos a pasa ariba diferente punto cu ta toca abuso di mucha. Tambe nos a pasa riba un parti di historia y na unda Aruba ta awor cu e cambionan cu a wordo introduci, entre otro aumento di castigo, meldpunt y algun ley mas cu ta na caminda prome cu 2021.

Pero nos tur sa cu nos kier mira Aruba avansa mucho mas ariba e topico aki. E avance tin di ta di un forma integral, esey ta nifica cu nos tin di haci cambio for di diferente angulo pa por logra un cambio drastico y duradero.

Sociedad

Famianan ta e fundeshi unda ta crea un comunidad, esta tatanan y mamanan for di kende yiunan ta nace. Na prome instante ta e deber y obligacion di cada mayor pa ta presente y proteha nan yiunan.

E pilarnan den nos comunidad ta entre otro, scolnan, departamentonan y fundacionnan, cu tin e tarea pa yuda cu formacion di nos yiunan na un forma sano. Por ultimo ariba e nivel di sociedad, e gobierno ta wordo apunta pa carga e responsabilidad pa nos tin un sociedad unda cu tin ordo y leynan cu ta brinda proteccion pa tur individuo.

Pesey mescos cu a aumenta e castigo maximo ariba abuso, gobierno tin di sigui cu ehecucion di por ehempel e proyecto Family Justice Center unda cu un survivor di abuso, por bay y ricibi guia, tratamento, conseho y asta por encamina un caminda legal contra e abusador.

Tambe ta importante pa sigui fortalece nos departamentonan cu e ayudo y finansas necesario, e no por cuminsa awor y para den algun aña. Nan tin di continua yuda educa nos muchanan y empodera nos proximo generacion.

Nos ta mirando cu e taboe riba abuso a cuminsa kibra den nos sociedad. Mas y mas persona ta lanta para contra abuso y esaki ta di aplaudi. Mas ciudadano ta lanta ariba y papia o busca ayudo pa nan situacion, pero tambe denuncia abusadornan.

Akinan tin hopi pa mehora y a urgi minister di Husticia pa cuminsa cu un comision pa debati cu huesnan ariba e castigonan cu ta wordo duna na abusadornan.

Aruba no tin espacio mas pa abusadornan no haya e castigo apropia, ayudo mental o keda scondi pa asina mas persona core risico di wordo abusa.

Plan integral

Gobierno tin 4 ministerio ta atende cu esaki.

1) Husticia; cu ta atende entre otro aumento di castigo,

2) Enseñansa; cu tin di pone den curriculo di scolnan basico e materia: BISA NO! CORE Y KEH’E! Pa siña muchanan reconoce señalnan y denuncia esakinan,

3) Salubridad; cu diferente campaña di prevencion, y

4) Social; cu social crisis plan – Unda tin un totalidad di 31 instancia trahando riba diferente aspecto social, entre otro Child protective system, y Family Justice center.

Tur esaki cu sosten incansabel di minister Presidente pa ken e tematica aki ta uno cu ta haya prioridad, fondo y sosten.

Algo importante cu nos por enfoca riba dje como ciudadanonan ta, no ban busca un culpabel. Ban acepta cu ta nos tur a faya como sociedad. Pero mes momento tambe, laga nos ta den un acuerdo cu e ta tuma nos tur pa e por drecha tambe, parlamentario Tevreden a finalisa bisando.

- Advertisement -

DUNA COMENTARIO

Please enter your comment!
Please enter your name here