Home Hudicial 12 aña di prison exigi pa grupo riba tugboat Gracia cu 2253...

12 aña di prison exigi pa grupo riba tugboat Gracia cu 2253 kilo di cocaina

142
0
SHARE
- Advertisement -

Fiscal a baha cu man duro  

ORANJESTAD (AAN) – Ayera mainta pa basta oranan a trata e caso penal cu Ministerio Publico a cuminsa contra un grupo di Venezolano y un Ecuatoriano, kendenan tabata riba e tugboat Gracia cu tabatin 2253 kilo di cocaina scondi den un bodega.

E tugboat tabata navega den awa teritorial di Aruba y a keda intercepta pa Guarda Costa. E destino di e tugboat tabata Trinidad & Tobago.

ACUSACION

E acusacion cu Fiscal a presenta den Corte contra e grupo ta cu riba 14 October 2019 nan tabatin 2253 kilo di cocaina riba e tugboat Gracia. E sospechosonan ta: Y.C.M.(ayudante maquinista), C.C.H.(kokki), J.C.R.(stuur), H.H.C. (capitan) y H.R.L.( maquinista). 

GUARDA COSTA TA INTERCEPTA TUGBOAT

Hues a mustra cu informacion a drenta cu e boto Gracia den awa territorial lo tin droga. Guarda Costa a intercepta boto. Durante investigacion riba e tugboat a constata cu e camber di machine tabata sera cu candal.

Esaki tabata bodega1. A puntra e capitan pa e yabi y el a bisa cu e no tin e yabi. A habri e candal y den e bodega a haya 81 saco conteniendo pakinan di cocaina. Door di esaki a detene tur 5 tripulante.

Den bodega 2 a haya 4 paki cu cocaina. 17 October 2020 ora tabata saca awa for di un compartimento a haya 3 paki di cual uno a los op den awa. En total a pisa 2253 kilo di cocaina. A test e pakinan y a confirma cu ta cocaina. E capitan H.H.C. y e otronan abordo a bisa cu e no sa di e droga.

Ta asina cu mirando e cantidad hopi grandi di droga, ya a destrui esaki. Hues a bisa cu Polis ta haya straño cu un cantidad asina grandi di droga ta abordo di e tugboat y ningun di esnan abordo no sa di nada. E destino di e tugboat tabata Trinidad & Tobago.

Parce cu e boto tabata na Colombia y a keda controla. Polis su pensamento ta cu si enberdad ta asina, e ora ey ta sospecha cu despues di e controla a pone e droga abordo. Tambe lo por ta cu durante e navegacion, a carga e boto. 

INTERPOL TABATA VIGILA BOTO

   Durante tratamento di e caso a sali na cla cu Interpol tabata vigila navegacion di Gracia. Via e sistema “Automatic Identification System” (AIS) tabata sigui e navegacion di Gracia. A constata cu tres biaha e señal a cay afor. Esaki a sosode algun dia promer cu e boto a keda intercepta.

   A sali for di Cartagena Colombia pa bay Trinidad & Tobago. Ta sospecha cu e momento ey lo tabatin ponemento di droga abordo. E zona ey ta conoci pa contrabanda di mercancia. A haya dos boshi di yabi den un cuarto. Dos yabi por a habri e candal cu tabatin e bodega 1 sera. E boshi yabi tabata den camber cu Y.T.C.M.  y J.E.C.R.

   Hues a haci cada un di e sospechosonan un serie di pregunta pa asina tin un claridad kico cada un tabata haci riba e boto y si nan tabata sa di e cantidad di droga cu tabata riba e otro. Fiscal tambe tabata haci preguntanan. 

EXIGENCIA DI FISCAL

   Fiscal a bisa Hues cu for di Colombia a haya informacion cu riba e tugboat Gracia tin un cargamento grandi di droga. Ora e boto aki tabata navega den awa territorial di Aruba, Guarda Costa a bay intercepta y a bin haya 2253 kilo di cocaina.

   For di e sistema AIS, Interpol a constata forma di navegacion sospechoso. E boto tabata navega ariba abao y bay bek. Esaki tabata sosode banda di costa di Venezuela. Esey no ta manera di navega pa bay destino Trinidad & Tobago.

   Na opinion di Fiscal, tur e grupo aki ta culpable. Pa cu e castigo, el a mustra cu no tin maneho stipula pa un cantidad asina grandi di droga. El a mustra riba casonan anterior caminda tabata papia di mas o menos 100 kilo y a duna 8 aña di prison.

   Fiscal ta haya cu mester baha cu man duro riba e traficacion di droga aki. E ta haya cu tur e grupo ta complice di traficacion di droga y a exigi 12 aña di prison pa cada un.

   Hues despues di a scucha defensa di e abogadonan, a bisa cu e ta bay studia e caso y dentro di algun siman lo por spera sentencia.

 

- Advertisement -

DUNA COMENTARIO

Please enter your comment!
Please enter your name here