Home Gobierno Un total di 5935 trahador cu den luna di April a cobra...

Un total di 5935 trahador cu den luna di April a cobra FASE aworaki ta pasa over pa loonsubsidie

1585
0
SHARE
- Advertisement -

Edwin Jacobs:

ORANJESTAD  (AAN): Manera a wordo expresa algun tempo atras caba, pa un compania yega na remarke pa ricibi subsidio di salario for di Gobierno, e compania mester demostra cu nan a perde por lo menos 25% di nan entrada.

Esaki director di SVb Edwin Jacobs a splica un biaha mas Dialuna mainta durante un conferencia di prensa.

Pa loke ta esnan cu a haci peticion pa loonsubsidie, Jacobs a splica cu te cu Dialuna tabata tin 3232 empresa cu a wordo categoriza como empresanan vulnerable y cu lo por tin hopi chens di sufri un perdida di mas cu 25%.

“Di esakinan pa Mei, 1647 a haci un peticion pa e subsidio di salario, di cual 1617 a haya e suma di subsidio transferi riba nan cuenta”.

“Un total di 30 empresa pues a haci un peticion pero no a ricibi e suma ainda”.

“Ta asina cu 16 di nan ainda no por duna SVb un cuenta di banco riba cual nos por transferi e suma”.

“Pa loke ta e otro 14 empresanan, dos biaha nos a manda e suma y banco a rechaza e transferencia”, segun Jacobs.

El a sigui bisa cu e companianan aki a wordo avisa pa tuma contacto cu nan banconan y pa provee SVb cu e informacion di banco, pa asina e subsidio por wordo paga.

Segun Jacobs, un total di 27.207 relacion di trabao a bin na remarke pa ricibi e subsidio , unda cu pa 15 di Maart e companianan tabata tin den nan servicio 28.122 empleado.

Un total di 4 compania a debolbe e subsidio, 9 compania a haya un chens mas pa inscribi pa e subsidio, 6 a haci un peticion pa e subsidio, mientras cu 900 trahador ya na e momento ey na Maart y April no ta den servicio mas.

“E unico forma cu den e periodo di loonsubsidie un trahador por wordo kita for di e lista ta, sea e relacion di trabao a termina prome cu dia 15 di Maart y nos no a wordo notifica, of e contrato tabata tin un tempo defini pa termina”.

“E contrato di un persona den servicio permanente solamente por wordo termina den un acuerdo mutuo”.

“Retiro pues via e ley di retiro no ta wordo otorga den e periodo aki”, segun Jacobs.

El a splica cu te cu aworaki tin 44.9 miyon florin cu a wordo paga na empresanan pa loke ta e subsidio di salario.

Segun e director, for di e 27.207 trahadornan menciona, a identifica 5935 cu den luna di April a cobra FASE y aworaki ta pasa over pa loonsubsidie.

Na FASE nan a cobra alrededor di 2.6 miyon florin y aworaki via Loonsubsidie esaki ta 7 miyon florin.

“Pa loke ta luna di Mei, mi mester gradici e equipo di Minister di Finanzas cu ta trahando tur cu tin riba diseño di e programanan aki”.

“Un team encabeza pa director di Departamento di Asuntonan Economico Industria y Comercio, señora Maria Dijkhoff- Pita”.

“Mi ta manda tambe un gradicimento pa e team di SVb cu den un tempo hopi cortico a logra cumpli cu comunidad”, segun Jacobs.

- Advertisement -

DUNA COMENTARIO

Please enter your comment!
Please enter your name here