Home Turismo Turistanan por haci test di Covid-19 na nan pais of test ora...

Turistanan por haci test di Covid-19 na nan pais of test ora nan yega Aruba

371
0
SHARE
- Advertisement -

CEO di ATA:

ORANJESTAD (AAN):   CEO di Aruba Tourism Authority (ATA), Ronella Tjin Asjoe-Croes a anuncia den conferencia di prensa cu e turista cu kier bishita Aruba lo tin dos opcion ora di aplica pa haya nan ED Card, cual lo ta uno obligatorio pa por drenta Aruba.

E opcion uno ta proporciona un prueba di Covid Test haci na e pais di origen di e bishitante of e di dos opcion ta yega Aruba y haci e test akinan y paga $75.

Tjin Asjoe-Croes a agrega cu esnan cu dicidi di haci test akinan, y cu no a entrega nan resultado negativo adelanta, nan ta pasa den e proceso di test aki na aeropuerto.

Na aeropuerto mes tin un logistica separa pa esnan cu no a test adelanta y esnan cu a provee e resultado adelanta cu tog ta wordo someti na 100% di chekeo di temperatura y 100% di chekeo di  sintoma, a splica.

Si e chekeo indica cu e persona mester wordo getest tambe nan lo wordo getest aki na Aruba si ta necesario.

Ronella Tjin Asjoe-Croes a sigui bisa cu ta trata akinan di dos diferente proceso cu ta wordo poni hunto pa tin e 100% di test como rekisito aki na Aruba, prome cu e salida y biaha pa Aruba.

Algun punto cardinal adicional ta cu den colaboracion estrecho cu e acomodacionnan, esnan cu a wordo getest akinan, esnan cu no a entrega nan resultado negativo adelanta, nan ta pasa den e proceso di bay 24 ora den cuarentena.

E motibo di esaki ta cu mester procesa e resultado di e test aki y pa esaki e personanan lo mester bay na nan acomodacion manera cu nan tin’e reserva caba. E hotelnan y acomodacionnan lo zorg pa esnan cu tin warda riba nan resultado, teniendo cuenta cu nan cuarentena di 24 ora, e CEO di ATA a indica.

Esaki ta algo cu lo wordo comunica adelanta na e bishitante, a agrega, pa e ta consciente di e proceso.

Si e turista tin sintoma na aeropuerto caba y e persona ta presenta sintoma na su hotel, esey lo implica cu e lo mester bay na un diferente acomodacion cu lo wordo asigna p’e como acomodacion di isolacion of cuarentena, a señala.

EXCEPCIONNAN:

E ehecutivo di ATA a splica cu tin algun excepcion chikito, pero bon pa menciona. Muchanan te cu 12 aña no tin cu wordo getest. Den e grupo aki e risico ta hopi limita y evaluando esaki cu expertonan, lo keda un excepcion.

El a agrega cu lo sigui evalua tur e diferente paisnan con esakinan ta evoluciona. Pa yega na e decisionnan cu a wordo tuma, a vigila tur otro pais. A midi e factor di risico, e casonan positivo cu por resulta for di e paisnan aki. tambe e grado di transmision y asina a yega na decisionnan di cual paisnan lo habri, cu e balans den mente entre salud y e aspecto economico. 

Lo sigui evalua e progreso di tur diferente pais pa asina por sigui ahusta, sea implementa mas medida of elimina algun medida, a enfatisa.

Na mesun momento lo vigila e procesonan y lo haci ahuste unda tin mester conforme e comportacion di e consumidor.

Corda tambe cu studiantenan Arubiano cu ta bin Aruba no mester haci e test na Aeropuerto.  Tampoco residentenan di Aruba cu sali pa viahe y bin bek.  Tampoco pa esnan cu ta bin for di Curacao of Bonaire.

 

- Advertisement -

DUNA COMENTARIO

Please enter your comment!
Please enter your name here