Home General Turismo gigante a bay biba den cas di enano

Turismo gigante a bay biba den cas di enano

182
0
SHARE
- Advertisement -

Aruba mester realisa su situacion den e pandemia turistico mundial 

*Industria peligroso a bira salida politico facil na 1986

*Empresanan y trahadonan local a bira  victima directo

ORANJESTAD (AAN) — A base di e coronavirus nobo, mundo a cera conoci cu un pandemia turistico. Na nivel mundial, turismo ta basha abou pa motibonan masha obvio cu tur persona cu a atende cu turismo, lo reconoce.

Si pa un refineria of industria di construi barco por ehempel, lo busca experto, pa turismo hopi bes ta bende pueblo mita berdad.

E loke ta pasa cu Aruba awe, sigur ta resultado di 1985 ora e pais mester a enfrenta su Status Aparte na momento cu Lago a cera su porta.

Pa comprende loke a pasa, no mester mira Lago como industria solamente pero na prome luga mester tene na consideracion e balor sentimental cu Lago tin pa Aruba cu sigur den Guera Mundial a haya un puesto economico internacional debi na e necesidad di azeta.

Ora e crisis di petroleo a presenta, Aruba a bira victima pero Aruba ya tabata desaroya su turismo, mescos cu un cantidad enorme di pais na mundo.

E alma di negoshi di turismo ta algo mas cu busca un destinacion cu un beach manera Aruba tin.

Negoshi di turismo di estadia, ta producto directo di e Era di Jet cu a permiti transportacion facil na un sistema mundial nobo di haci negoshi.

Cadenanan di hotel y otro facilidadnan turistico a habri nan porta na luganan, cu e turismo di crucero a indica como bon negoshi. Aruba ademas di esaki, pa motibo sigur di Lago cu tabata trece stranhero y nan famia y despues cruceronan, a bira popular debi na su naturalesa y Arubianismo.

Durante e ultimo gobierno insular di Aruba, hopi a wordo haci pa engrandece turismo. Ora crisis di Lago a bati na porta, turismo mester a bira salbacion.

Por a uza turismo sin riesgo grandi pa habri caminda pa futuro, pero e fayo tabata sconde den e forma cu turismo a bira explosivo.

Tabata tin mas camber di hotel, cu trahado pa traha den hotel. Mester a importa mas trahado.

Comercio local a cuminsa haya competencia di companianan internacional grandi, cu tabata kita negoshi for di e comerciante Arubano ora a cambia leynan.

Aruba a cambia. Aruba a entrega su personalidad di isla di encanto cu un turismo cu a conoce competencia interno pero tambe tabata bira cada rato mas peligroso.

Na 2014 tabata obvio cu turismo tabata den decadencia pisa ora Venezolanonan no por a biaha mas. Na e momento Aruba, e situacion a bira mas peligroso pa motibo cu Aruba mester a depende pa e parti mas grandi di turista Mericano so.

Awe tur pais cu turismo na mundo, ta den problema serio. Turismo ta conoce su mes pandemia cu un poblacion mundial cu a bira pober.

Hasta si e turista no tin miedo di Covid-19, e no kier biaha. Intrankilidad mundial ta presente rond mundo.

Aspectonan cu ta stroba turismo, ta sigui bini dilanti. Aruba ta bira parti di e problema mundial di turismo, cu hopi pais a haci nan base economico.

Na 1986 turismo a bira un solucion facil y un gigante a bay biba den un cas enano. E cifranan di cantidad di turista cu por yama “normal” pa Aruba cu un competencia sano, a surpasa normalidad.

E trahado Arubano a keda cu competencia grandi. Empresanan Arubano ta den problema.

Cu regreso di e turista, cu lo ta paso a paso, mester cuminsa atende turismo cu mas vision realistico y tene na consideracion tambe cu industria turistico ta cambia y ta exigi inversionnan enorme mientras cu e ta depende di clima, di agente biahero, di avionnan, di trankilidad politico y mucho mas cu ta haci turismo un sector economico di riesgo halto!

 

- Advertisement -

DUNA COMENTARIO

Please enter your comment!
Please enter your name here