Home General Trahadornan di Parke Arikok preocupa cu e lugar por bati bancarota

Trahadornan di Parke Arikok preocupa cu e lugar por bati bancarota

1816
0
SHARE
- Advertisement -

ORANJESTAD (AAN): E ta un situacion cu aworaki tin basta trahador na Parke Arikok preocupa.  Specialmente ora cu nan a bin tende for di e hefe mes, cu e chens ta grandi cu Parke Arikok lo por bati bancarota.

   For di 13 di Maart cu e prome casonan di Covid-19 a keda registra na Aruba, e situacion economico di tur cos na Aruba a cambia.  Dado momento e isla a bay den lockdown pa asina mitiga e brote di Coronavirus nobo.

   Esey a nifica, cu cranchi pa e fluho di turista riba e isla a cera abruptamente.  Mesora Casinonan, Hotelnan, Restaurantnan, Taxi, Tours, y negoshinan directamente liga cu e industria Turistico a cay te na cero.

   Y ta parce cu awor, Parke Arikok tambe ta uno cu a dal den duro!

   Siman pasa, e trahadornan a wordo yama pa un reunion urgente cu e Director.  E trahadornan di Parke Arikok a keda asombra di loke e hefe a bin bisa nan.  Esey ta cu debi na e situacion di pandemia, e trahadornan tambe tin di bay entrega parti di nan salario, sino e Parke lo por bati bancarota.

   Loke mas a laga nan babuca, ta ora cu e Director a revela kico e trahadornan tin di bay entrega.

   Ademas di 20% di salario cu nan mester entrega, e trahadornan di Parke lo tin di bay traha menos ora pa siman sin pago.

   Lo mas espantoso, ta cu nan tin di bay entrega completamente tur toelage cu nan tin pa hopi aña.  Toelage manera ‘back to school’, gelijkbedrag, y tambe bashi premie.

   Esaki ta algo cu e trahadornan a guli manera un pildora amargo, y hopi no ta di acuerdo cune.  Pasobra si acaso gerencia di Parke Arikok kier corta vet, nan mester cuminza na halto mes.

   Den un declaracion na DIARIO, algun trahador a expresa cu lo ta mihor pa e Director bay corta den e personal cu tin na halto.  Increible pa kere cu Parke Arikok tin 10 Managers riba payroll.  “Diez managers den Parke Arikok ta demasiado, cos cu bo no por kere mes ta pasa na Aruba!  Lo ta mihor nan manda algun di e managernan aki pa cas, como cu nan no ta ehecuta casi nada eyden,” a ser bisa na DIARIO.

   Fuera di esey, ta conoci cu Parke Arikok tin 2 Director.  Pues eynan tambe por corta vet pa asina spaar placa.

   Loke e trahadornan di Parke Arikok ta lamenta, ta cu nan mes nunca como empleado no a haya un oportunidad di papia cu Raad van Toezicht pa asina nan mustra tur preocupacion cu nan tin.

   Nan ta desea tambe pa Raad van Toezicht a revela na e trahadornan di Parke Arikok ta unda tur e placa cu Parke a ricibi como ganashi den ultimo añanan a slip bay.

   Trahadornan awor ta preocupa, y nan ta haciendo un suplica pa por fabor Ministro drs. Marisol Lopez-Tromp haci un intento pa reuni lo mas pronto posible cu nan pa asina nan por expresa nan preocupacion, y haya sa tambe di e mandatario kico ta su opinion riba e asunto aki.

   Hecho ta cu siman ta habri, y awor e trahadornan di Parke Arikok tambe ta spanta cu e menaza, cu e lugar por bati bancarota.

 

- Advertisement -

DUNA COMENTARIO

Please enter your comment!
Please enter your name here