Home General Tankinan Citgo prueba di diferencia entre dos gobernacion

Tankinan Citgo prueba di diferencia entre dos gobernacion

131
0
SHARE
- Advertisement -

Investigacion di Refineria mester bini prome cu proximo eleccion

*Awe den crisis mundial di turismo Wever-Croes ta lucha pa entrada

*Ayera hasta Nicolas Maduro a haya chens pa haci Aruba payaso

ORANJESTAD (AAN) — Duna tempo na tempo pa tur berdad sali na cla. E berdad aki ta resumi loke a pasa na Aruba for di 2009 te cu 2017 ora un gobernacion nobo mester a busca un futuro pa Aruba, cu gobierno anterior a hiba practicamente na e abismo di bancarota.

E tankinan di Citgo awe ta mustra riba e gran diferencia entre dos gobernacion y e respet cu nan ta demostra na dignidad di e pueblo di Aruba.

E loke a pasa cu Aruba den e drama di Citgo, ta prueba di e bofon cu a wordo haci cu Aruba dor di gobierno anterior.

Gobierno Mike Eman a hinca Aruba den un situacion cu ni diabel lo a acepta den fierno. A baha entrada di Aruba dor di baha BBO pa introduci un debe, cu a bira un yugo na garganta di e Arubiano.

E Arubiano a wordo ciega y ora e drama di Fort Zoutman a wordo inicia, no tabata consciente cu ta Hulanda tabata defende bienestar di Aruba contra gobierno anterior cu a destrui bienestar di Aruba.

Mester a bini medida pisa, pero a logra evita esaki ora gobierno anterior sin ningun reserva, a uza Nicolas Maduro pa trece Citgo Aruba.

Un bista riba internet por mustra con instancianan den Reino y corantnan rond mundo, realmente tabata preocupa cu  bienestar di Aruba of tabata hari Aruba a base di e hecho cu Mike de Meza a declara cu Nicolas Maduro lo a pone e prome 300 Miyon riba mesa.

DIARIO ta dispuesto pa presenta tur e pruebanan pa esaki pasobra ta inaceptabel e forma con gobierno anterior a trapa riba leynan y hasta democracia pa introduci e proyecto na Aruba.

Mundo a hari Aruba, cu a permiti Nicolas Maduro cu tabata uza Citgo como su baca di lechi, pa bin Aruba. Gobierno anterior a manda Valero bay a base di un areglo, cu mundo a discuti. E pregunta a keda semper habri, pakico no a saca mas bentaha pa Aruba.

Gobierno anterior a entrega e refineria di Aruba na Nicolas Maduro cu a perde e refineria di Curaçao na 2016 y a laga un desastre atras na loke tabata un tempo un refineria.

Un acuerdo di abuso a wordo alcansa entre gobierno anterior y Nicolas Maduro, representa pa Nelson Martinez, socio stima di gobierno anterior y awor menciona den casonan criminal na Merca.

Awe Ministro Presidente Wever-Croes ta busca un solucion pa Aruba. Den un crisis mundial cu a uni na e desastre financiero cu gobierno anterior a laga atras, e ta busca un forma pa huur e tankinan di Citgo, cu ta den problema serio.

Cualkier momento Citgo por cambia di doño y Aruba por haya su mes den mas problema a base di e aventura entre gobierno anterior y Maduro cu a haya chens di haci Aruba payaso.

Prueba ta wordo duna di e diferencia entre dos gobernacion. Palabra ta keda na autoridad, cu mester investiga e acuerdo di Citgo y tur loke ta relaciona cu e refineria, cu a bira un berguensa den historia di Aruba.

 

 

 

 

 

 

- Advertisement -

DUNA COMENTARIO

Please enter your comment!
Please enter your name here