Home Parlamento Ta dispuesto pa haci un reforma fiscal, pero tin cu haya tempo...

Ta dispuesto pa haci un reforma fiscal, pero tin cu haya tempo pa crece prome

209
0
SHARE
- Advertisement -

Adi Thijsen: Kier hala Parlamento mas leu posibel for di Gobierno

ORANJESTAD (AAN):  Diahuebs DIARIO a logra haya un entrevista cu presidente di Parlamento Adi Thijsen y a puntre si apesar di e crisis di Coronavirus, Parlamento ta bay haya un bon chens pa cumpli cu su tareanan.

Thijsen a bisa cu e ta keda fielmente den un estado di derecho, unda cu bo tin Gobierno, Parlamento y bo poder judicial.

“Cada un di esakinan tin su responsabilidad, pues cada un mester haci su trabao. Si bo wak den e periodo prome, mi por bisabo cu tabata tin un periodo durante di cual e estado di derecho no tabata funciona bon.

“E tempo ey bo ta wak cu Parlamento a bira un ‘verlengstuk’ di Gobierno en vez di controla Gobierno”, segun Thijsen.

El a sigui bisa cu Parlamento no tabata tene cuenta cu e institutonan manera Algemene Rekenkamer, Raad van Advies, etc. “Pesey nos ta bezig ta cambiando esaki awor”.

“Nos ta bezig cu un proceso di independisacion di institutonan manera ARA y Raad van Advies, mientras cu nos kier hala Parlamento mas leu posibel for di Gobierno”.

“E intencion ta tambe pa Ombudsman bin”.

“Nos como Parlamento mester cumpli cu nos obligacionnan na pueblo. Nos tin un tarea pa haci pasobra Gobierno tey, pero nos tin cu contra Gobierno y nos por guia y stuur hunto den ki direccion e pais ta bay”, segun e presidente di Parlamento.

Segun Thijsen, despues cu Gobierno y Parlamento nobo a sinta na 2017, Aruba a wordo confronta cu un crisis economico, un crisis financiero un crisis social.

Despues a Gobierno a wordo confronta cu crisis di Venezuela, sigui pa e  crisis di COVID-19.

“E crisis di Coronavirus a dal Aruba duro y awor nos tin cu drecha cos bek”.

“Apesar cu mi no kier bringa cu Hulanda, nos tin un diferencia di opinion cu Hulanda”.

“Hulanda ta hunga un rol hopi grandi y tanten cu nos ta den Reino Hulandes, Hulanda mester compronde cu e mester traha cu hechonan”.

“Aworaki Secretario di Estado Knops a haci dos expresion cu no ta bon”.

“Knops a bisa cu Corsow, St. Maarten y Aruba no por maneha nan autonomia y el a bisa tambe cu e islanan no tabata tin nan presupuestonan na ordo. Nos a maneha nos autonomia semper, apesar cu na 2009 cos a bay fout. Boso mes a bin cu supervision financiero pa 3 aña y bosonan (Hulanda) a comete foutnan cu a pone e cos bira peor”, segun Thijsen.

El a sigui bisa cu for di mas cu 400 miyon florin di deficit, den dos aña di tempo Gobierno actual y Parlamento a traha duro pa duna Aruba un surplus di 49 miyon florin.

“Pues nos a maneha nos autonomia y nos presupuesto”, segun e presidente di Parlamento, kende a splica cu e situacion di Corsow, St. Maarten y Aruba ta diferente di otro.

“Aruba a lucha pa su Status Aparte y nos a logra, mientras cu nos debenan no a wordo paga. Al contrario, Aruba mester a hinca placa den e fondo di solidaridad. Nos a lucha y Aruba a crece bay.

“Te hasta por bisa cu Aruba a bira e victima di su propio exito, mirando cu mester a laga hopi hende drenta, pasobra nos tabata tin mester di hende pa traha”.

“E punto cardinal ta cu e relacion constitucional entre Hulanda y Corsow ta uno cu ta causa un problema pa Corsow, mientras cu Aruba su situacion ta diferente, pasobra Aruba no tin un asina yama Consensus Rijkswet manera Corsow, cu a pone e Parlamento di Corsow bira lam”.

“Ta na 2014 ora cu a bin cu un KB, e CAft a wordo introduci. Sinembargo nan no a hinke den un Consensus Rijkswet. Nan a copy paste e Consensus Rijkswet ey y hinke den un Landsverordening. Door di esaki ta nos tin e autoridad, esta Parlamento y Gobierno di Aruba. Pesey nos a haci e cambionan cu nos por a haci pa mustra nan cu nan no tin autoridad”, a indica.

   “Door di esaki nan kier impone cosnan riba nos, pero nan no por logra, pasobra nan sa cu constitucionalmente nos ta para fuerte”, segun Thijsen.

    El a splica cu awor cu Coronavirus a bin, Hulanda a pensa cu nan por impone riba Aruba, pasobra nos tin mester di nan placa,

    “Awor nan kier impone condicionnan riba nos y eynan nos tin un discusion cu nan”, segun e presidente di Parlamento.

    El a sigui bisa cu Hulanda a regala Italia y otro paisnan cu tin dificultad  biyones di euro, siendo cu Aruba cu ta den Reino a haya un prestamo cu varios condicion.

“Nos ta dispuesto pa haci un reforma fiscal, pero nos tin cu haya tempo pa hacie. Yuda nos prome cu nos reconstruccion y e ora ey nos por cumpli bon cu e reforma”, segun Thijsen.

Si mi corta aki y aya, ta mas problema mi ta bay haya como pais”, el a expresa.

 

 

 

 

- Advertisement -

DUNA COMENTARIO

Please enter your comment!
Please enter your name here