Home Coronavirus Residentenan mester haci test prome cu subi avion pa bolbe Aruba of...

Residentenan mester haci test prome cu subi avion pa bolbe Aruba of aki na Aruba

3526
0
SHARE
- Advertisement -

*Ta conta tambe pa Arubianonan cu ta biba den exterior y kier bin bishita nan famia

*Studiantenan mester verifica si nan seguro ta cubri Covid

ORANJESTAD (AAN):  Durante Conferencia di Prensa di Gobierno di Aruba diaranson anochi, Prome Minister Evelyn Wever-Croes y Minister di Salubridad Dangui Oduber a anuncia cu Gobierno a dicidi di habri fronteranan.

    Gobierno di Aruba na un forma hopi responsabel a dicidi di gradualmente habri e fronteranan cu condicionnan hopi estricto. E condicion di mas estricto ta e 100% testing sea na nan pais di origen of aki na Aruba. E gastonan di e test ta core pa nan propio cuenta. Ademas Aruba ta exigi un seguro pa Covid pa cubri eventual gastonan di tratamento di Covid, cu den casonan extremo por ta gastonan di cuido intensivo hopi halto. E gastonan aki Gobierno no por carga.

   Deliberacionnan ta andando cu tur compania di seguro na Aruba pa por ofrece e seguro aki y den e siguiente dianan lo duna mas informacion al respecto. E companianan local a bay di acuerdo caba pa brinda e cobertura di Covid-19.

   Bou e condicionnan aki y algun otro condicion, nos ta dispuesto pa habri pa turista. E interes di turista pa bin Aruba ta grandi y p’esey ta sinti cu por exigi e medidanan extremo aki di precaucion, teniendo cuenta cu  no kier importa e virus y permiti esaki plama na Aruba

   Den un siguiente fase, lo flexibilisa e exigencianan, dependiendo con e virus sigui desaroya.

  

RESIDENTE Y STUDIANTENAN

 

   No por aplica e mesun exigencianan pa e residentenan pero si residentenan biaha pa exterior despues cu frontera habri, residentenan tambe mester haci e test sea prome cu subi avion pa bolbe Aruba of aki na Aruba.

  Pa e studiantenan den exterior ta haciendo estudionan ainda pa mira si nan seguro ta cubri Covid. Si esaki ta e caso, nan no mester cera un otro seguro. Mientras frontera ta cera y probablemente mientras Covid ta un pandemia, probablemente e seguronan di biahe of di malesa conoci, no ta cubri gastonan di Covid.

     Ta bon pa cada studiante cu kier bin Aruba verifica esaki cu su seguro. Esaki ta conta tambe pa demas Arubianonan cu ta biba den exterior y kier bin bishita nan famia.

   Gobierno ta pidi comunidad poco espacio y tempo pa caba di regla tur cos awor pa re apertura di nos pilar economico, turismo. Mientras ta trece claridad riba exigencianan pa residentenan y studiantenan Arubiano.

   Poco poco ta trahando pa re activa economia pa por recupera di e efectonan devastador cu Covid a causa henter Aruba. Ta determina pa no permiti miedo ni Covid dirigi nos, sino mas bien nos ta determina pa na forma responsabel reconstrui nos pais bek.

   Como Gobierno kier garantisa comunidad cu a tuma tur e medidanan di siguridad y prevencion cu por a tuma pa limita e riesgo mas hopi posibel. Ta sinti cu mas cu esaki nos no por a haci.

 

- Advertisement -

DUNA COMENTARIO

Please enter your comment!
Please enter your name here