Home Gobierno Proceso a cuminsa pa busca proyectonan pa area di refineria

Proceso a cuminsa pa busca proyectonan pa area di refineria

160
0
SHARE
- Advertisement -

ORANJESTAD (AAN): Dialuna Prome Minister Evelyn Wever Croes a papia riba ‘Request for Expression Of Interest’ (REOI) pa loke ta nos refineria.

“Awe e REOI ta wordo publica y nos ta haci’e cu un notificacion publico riba un website na diferente idioma, pasobra nos kier yega na e comunidad internacional”, segun e mandatario.

El a splica cu Dialuna 8 di Juni e proceso a cuminza pa Gobierno busca un operador nobo pa e refineria of un inversionista cu kier haci un otro inversion.

E REOI ta bay wordo publica tambe den corantnan local y internacional y riba websites na Aruba, Merca y Europa.

Den esaki Gobierno di Aruba ta bay cana dos proceso simultaneo y paralelo.

Dos proceso, esta REOI 1 y REOI  2.

Pa loke ta number 1, Gobierno ta pidi tur hende interesa pa expresa nan interes pa reapertura di refineria.

Den e mesun REOI 1 ta busca industrianan relaciona cu refineria y energia manera facilidadnan petro quimico of energia alternativo of energia duradero.

E di dos, esta e REOI 2 ta pa interesadonan expresa nan interes  den cualkier otro tipo di desaroyo, cu ta genera empleo y desaroyo economico similar na esun di e refineria.

“Nos kier pa tur esnan interesa expresa nan interes simultaneamente y a base di esey nos ta bay scoge e mihor opcion pa Aruba”, segun Wever Croes.

El a sigui bisa cu den e notificacion publico Gobierno di Aruba a stipula algun exigencia.

Un di e exigencianan ta cu e actividad mester genera cuponan di empleo y desaroyo economico significante.

E di dos ta cu e mester cumpli cu reglanan medio ambiental.

E mandatario a splica cu hunto cu e minister di Infrastructura y Medio Ambiente a stipula adelanta kico ta e exigencianan aki.

“Esnan cu expresa nan interes adelanta ta haya sa cu nos pais tin norma y reglanan di medio ambiente cu nan tin cu atene nan mes na dje”, segun Wever Croes.

E di tres condicion ta cu e actividad mester por cumpli cu e maneho di Reino riba tereno di relacionnan exterior y tambe cu e maneho di OFAK di Merca.

Esaki ta pa evita cu Aruba lo bolbe cay den discusion di sancionnan di Merca riba Venezuela of no.

“Si tin un interesado cu ta den problema cu Gobierno di Merca debi na OFAK, nos no ta ni interesa pa cuminza papia mes”.

“Esaki ta conta tambe si e no ta cuadra cu e maneho di relacionnan di exterior di Reino”, segun Wever Croes.

E mandatario a sigui bisa cu interesadonan por download e formularionan necesario cu ta disponibel riba e website www.government.aw.

E entrega ta bay ta den man di un notario cu ta bay mantene e informacion confidencial te na e momento despues di e deadline.

Tur esnan interesa tin 6 siman for di dia 8 di Juni pa reacciona  y pa nan entrega nan oferta.

E deadline pues ta riba 17 di Juli cu ta e dia riba cual e notario ta bay habri e ofertanan y pasa nan den man di e  comision cu ta bay haci e evaluacion,  cu ta bay tuma lugar 4 siman.

Esaki ta nifica cu pa dia 14 di Augustus e resultado di e procedura di e expression of interest lo wordo anuncia.

Ta bay traha cu 3 diferente comision, pa tur cos wordo structura bon

 

- Advertisement -

DUNA COMENTARIO

Please enter your comment!
Please enter your name here