Home Parlamento Premier Wever-Croes kier sa di con Mike de Meza tabata actua straño...

Premier Wever-Croes kier sa di con Mike de Meza tabata actua straño den Parlamento

86
0
SHARE
- Advertisement -

ORANJESTAD (AAN): Diaranson mainta durante reunion di Parlamento pa atende e asunto di prestamo di Hulanda na Aruba, dado momento e parlamentario Edgard Vrolijk di MEP tabata hiba palabra.

   El a menciona cu ta bergonzoso pa mira con algun Parlamentario cu tabata den Gobierno antes, tabata reuni cu figuranan obscuro durante negociacion pa cu contract di refineria di Citgo, y hasta tin potret saca di nan.

   Esaki ta momento cu Parlamentario Mike de Meza di MEP a lanta y pidi un persoonlijk feit, y a asina a sigui intercambio entre nan dos, unda dado momento De Meza a hasta yama Edgard Vrolijk pa ‘dom’.

   Na final, De Meza a bisa Vrolijk, cu e figuranan obscuro ey cu el a papia di dje, ta hendenan cu despues tambe a reuni cu Prome Ministro Evelyn Wever-Croes y tambe Ministro Glenbert Croes. 

   Vrolijk na su turno a bisa De Meza, cu e prefera di ta dom y no corupto, y cu e ta cana cu holoshi Rolex regala door di figuranan obscuro.  Aki Vrolijk a mustra cu na su man mes e no tin holoshi bisti, pasobra e no tin placa pa cumpra.

   Mas despues ora cu Prome Ministro Evelyn Wever-Croes a bin na palabra, el a reacciona riba e remarke di De Meza, esta cu Premier tambe a sinta na mesa cu diferente figura obscuro.

   “Ami no a saca potret cu ningun di e hendenan ey,” ta loke Wever-Croes a bisa, y el a subraya cu ta importante pa coregi esaki.  El a mustra cu e sa bon-bon ta cu kende e ta reuni.

   Aki De Meza a pidi un persoonlijk feit, y a bisa cu e mes lo bay manda pa Premier e potret y articulonan cu Premier mes a skirbi ora cu el a sinta reuni cu e hendenan ey.

    Premier Wever-Croes a sigui bisa cu e sa bon-bon cu kende e ta sinta, y alavez e sigur no a sinta cu Rincon, ni Gomez.

   Segun Prome Ministro, parlamentario De Meza riba Diaranson a duna señal straño eyden, y e ta kere cu mester adresa esaki.  El a bisa cu De Meza no a djis haye cu discusion cu Vrolijk y hinca Premier aden.  Pero di henter dia De Meza ta teima riba cosnan cu e no ta compronde di unda ta saca nan.

   Riba Diaranzon mes, De Meza a emiti un boletin pa bisa cu  FMSA cu ta compania di pueblo, a wordo duna na friends and family.

    Premier Wever-Croes kier a sa, si acaso De Meza mes a skirbie?  Esun cu a skirbie ta bao influencia.  El a adresa algun punto, unda cu De Meza ta mustra cu e no ta compronde con durante crisis di Coronavirus y tambe medida di Shelter-in-Place y Samenscholingsverbod, toch e trabaonan na Citgo a sigui  normal, y cu ta Premier Wever-Croes a duna luz berde pa trabao sigui na refineria.

   E ta un observacion raro di De Meza, pasobra e refineria ta wordo considera como empresa critico/esencial pa Aruba.  Imaginabo si Aruba declara WEB y Elmar como no-esencial, imagina kico lo a pasa.  Imagina bisa cu FMSA no supply fuel pa WEB.

   E ta haya straño cu net ex-Ministro di Energia ta bin cu e punto, y ta mustra comosifuera cu De Meza no sa cu nan ta compania esencial y critico.

   De Meza a bisa cu ya Gobierno tin deal cu grupo cu lo huur e tankinan for di Gobierno, comosifuera e tankinan ta di Gobierno, algo cu RDA mes por a keda encarga cune.

   Wever-Croes a subraya cu RDA ta unico instancia ta atende e tankinan.  Gobierno tin ni arte ni parte riba e tankinan, y Premier a bisa cu e mes ni sa ken a ofrece pa huur nan.  Hecho ta cu e companianan cu a haci oferta, awor ta wardando riba screening.  Pasobra Gobierno no ta traha cu ken cu ta.  Pues Gobierno no ta huur nada, y tin arte ni parte den dje.

   Awor De Meza ta bisa cu FMSA no ta encarga mas cu fuel pa avion ni distribucion di gasolin, y ya tin compania di friends and family cla pa tuma FMSA.

   Pero esaki no por ta, pasobra FMSA ta un compania di RDA y ta keda di pueblo.  No antes tempo cu Gobierno di AVP, pasobra e tempo ey inclui a posibilidad pa bende accion di FMSA na tercer partido.  No djis bende, pero Gobierno di AVP a hasta pone prijs caba, cu ta 40 miyon Florin e benta di FMSA lo ta.   Ministro di AVP a hasta hinke den presupuesto.

   Pero den Parlamento, hasta a bin cu amienda pa blokea e bendemento di FMSA pa percura pa nan keda di pueblo.  Pero AVP no tabata kier esey y a vota pro.  Bon mes cu gobierno a vota pa cambio.

 

- Advertisement -

DUNA COMENTARIO

Please enter your comment!
Please enter your name here