Home Gobierno No ta den plan di gobierno pa afecta ningun grupo di e...

No ta den plan di gobierno pa afecta ningun grupo di e comunidad cu cortamento di gastonan den AZV

95
0
SHARE
- Advertisement -

Minister Dangui Oduber: E siman aki lo anuncia fecha pa habri frontera

ORANJESTAD (AAN): Minister Dangui Oduber a duna di conoce diaranson atardi den un entrevista den e programa La Mania, cu Aruba mester adapta na e normal nobo pa asina por reactiva e economia di e isla.

El a bisa cu salud ta na prome lugar, pero na otro banda, si tur hende ta keda na cas e ora no lo tin trabao y nada lo pasa den loke ta e reactivacion economico.

Oduber a referi na un pregunta specifico cu a wordo haci riba e reduccion di gastonan di AZV. Hulanda a pidi pa e islanan den Reino Hulandes, corta gasto, pero na otro banda mester di inversion tambe. Pesey e ta considera e peticion di Hulanda algo contradictorio. Ta haciendo ehercicionan pa por yega na  un reduccion di gastonan.

El a bisa cu AZV ta un derecho di tur ciudadano y ta un ley anti -discriminatorio. Relaciona cu e posibilidad di kita e derecho aki na e stranheronan cu ta biba na Aruba y cu no ta traha, a laga sa cu e plan di gobierno no ta contempla elimina AZV di e stranheronan, manera  a wordo menciona den un medio di comunicacion.

AZV ta un seguro medico cu den ley ta cubri tur esnan cu ta inscrito na Censo, a splica.

Oduber a señala cu e seguro medico na Aruba mester ta un orguyo ya cu Aruba ta un di e poco paisnan cu tin e tipo di seguro aki. Esnan cu no ta contribui na e fondo, ta contribui  tog pa medio di e asina yama BAZV, pesey no por haci distincion of discriminacion.

Mayoria di hende na Aruba ta descendiente di un latino y pesey no mester drenta den un discusion awor  relaciona cu e asunto aki cu ta ancra den ley, a bisa.

Tur hende por tin un idea pa reduci gastonan. Y esey ta un di e ideanan cu a wordo treci dilanti. Gobierno tambe tin su ideanan pero tur propuesta mester sosode pa medio di un cambio di ley, a añadi.

Gobierno tin plannan pa baha gasto sin cu mester yega asina leu di bay cambia e ley. Prome mester purba convence Hulanda di e plan di gobierno, pa reduci 5 miyon florin, a bisa.

Gobierno no ta evaluando pa afecta ningun grupo na Aruba, sea latino, mericano, europeo, etc, a remarca.

Segun Dangui Oduber, Aruba a wordo afecta masha hopi cu Covid-19 door di e dependencia di e turismo. Hopi ciudadano ta pasando den momentonan dificial.

Desde cu Aruba a haya su status aparte no a pidi prestamonan na Hulanda, a señala. Semper a pidi asistencia internacional, pero den e caso aki mester a pidi ayuda di Hulanda ya cu no por a pidi asistencia di otro paisnan, meymey di e crisis aki sin precendente.

Aruba mester bira menos dependiente di Hulanda. Aruba ta un pais autonomo. Tin problemanan awor, pero no kier pa Hulanda mishi cu e autonomia aki, Minister Oduber a remarca.

E SIMAN AKI LO ANUNCIA FECHA PA HABRI FRONTERA

El a agrega cu e siman aki lo anuncia e fecha cu e fronteranan lo wordo habri. Manera a wordo anuncia, e fechanan tentativo ta entre 15 di Juni y 1 di Juli.

E mandatario ta consciente di e riesgo di importacion di Covid-19 ora di habri frontera, pero pesey  ta trahando riba e controlnan pa limita e risico aki. Tin protocolnan cu a wordo traha specificamente pa esaki, Oduber a indica.

Ta proyecta 1000 pa 2000 turista pa siman. Esaki ta nifica unicamente 10 pa 20 porciento di e cantidad di turista cu Aruba tabata custumbra di ricibi. Pero poco poco lo cuminsa reactiva e economia y Aruba en general, a splica.

       
  

- Advertisement -

DUNA COMENTARIO

Please enter your comment!
Please enter your name here