Home Hudicial Mama a wak riba video di cellular con su casa tabata abusa...

Mama a wak riba video di cellular con su casa tabata abusa di nan yiu muher menor di edad

1134
0
SHARE
- Advertisement -

 Fiscal a exigi 6 aña di prison

ORANJESTAD (AAN) – E homber Venezolano D. biba na Aruba ayera mainta a scucha Fiscal exigi 6 aña di prison. Fiscal ta haya D. culpable di a abusa sexual di su propio yiu muher menor di edad durante un periodo larga y tambe di tabatin imagennan pornografico di e yiu muher.

ACUSACIONNAN

E acusacionnan cu Fiscal a presenta den sala di Corte contra D. ta cu entre 4 Juni 2016 y 31 October 2019, el a abusa di su mesun yiu muher N. menor di edad. Tambe cu el a saca potretnan pornografico di e yiu. Den sala di Corte tabata presente mama di e mucha, ex partner di D. Por a mira cu e mama tabata yora y un traductor dama a hiba papel p’e por seca su wowonan.

SOSPECHOSO TA NENGA

   E sospechoso D. a bisa Hues cu tur e cosnan aki ta un set up. Hues a mustra cu tur cos a cuminsa despues cu e mama di nan yiu a haya e cellular bieu di D. Riba cellular tin 2 video di imagen di relacion sexual cu muher. Polis a mira e video caminda ta mira e parti intimo di e homber ta penetra e parti intimo di un muher. Ta scucha stem. E ex partner a bisa Polis cu e ta reconoce e stem di su yiu muher y a reconoce su partner D. Hues a bisa cu Corte y Fiscal no por a mira e video door cu ta inmoral. Hues a mustra cu tres familiar di e mama a reconoce e mucha na su stem y e pajama cu e tin bisti.

YIU MUHER TA BISA TUR COS

   Hues a bisa cu tin un video di un relacion sexual y ta mira e man di un homber. Hues a puntra D. si ta e ta e persona. El a admiti cu ta e ta riba e video. E tin un tattoo riba su man y un mancha cu ta mira riba e video tambe. Hues a puntr’e cu ken e tabatin relacion. Segun D. e tabatin relacion cu un dama pero no su yiu muher menor di edad. E no ta corda kende e dama ta. El a bisa cu e tempo ey e tabata na Venezuela door cu su tata a fayece y e tabata bebe hopi y tabata depresivo.

E videonan a wordo haci riba 2 y 5 April 2019. Hues a mustra cu algun luna promer cu D. a wordo deteni, e yiu muher N. a bay biba serca su mama. E mucha tabata afecta y tabata corta su mes cu blade. Na school psycologo di school a papia cun’e y trahador social di e school.

Nan a traha un relato pa Corte cu e mucha N. ta duda si e mester bisa e berdad of no. Nan a bis’e pa bisa e berdad y el a cuminsa yora. Despues el a bisa cu ta e ta esun riba e video y cu e tabatin relacion sexual cu su tata. El a bisa cu esey tabata sosodiendo pa tempo largo, tempo cu e tabatin 12 aña. Segun D. e no a tene relacion cu su yiu muher. El a bisa cu semper nan tabata bon cu otro.

EXIGENCIA FISCAL

Fiscal a bisa Hues cu e ta haya legalmente proba tur dos acusacion contra D. E ex partner di D. a haya 2 video riba e cellular di D. y a reconoce su yiu muher y tambe D. ta tene relacion sexual. Tres familiar, entre otro e ruman muher di D. a reconoce e stem di e yiu muher N. E mama a ripara cu su yiu tabata hopi depresivo y kier a mata curpa. N. a bisa cu su tata a menace pa no bisa nada.

Riba man di D. tin un tattoo cu por mira claramente riba e video. Fiscal a mustra cu D. tabata zoom cu e camera, ora e tabata tene relacion sexual cu su yiu. Na opinion di Fiscal, D. a admiti cu ta e ta riba e video pero no ta su yiu pero un otro dama. Pero e mucha mes ta admiti cu ta e tabatin relacion cu su tata y cu el a bisa su tata pa no filma pero su tata a haci’e. Fiscal a cuestiona e hecho cu door di esaki e victima a bira depression y tabata corta su mes. Fiscal ta haya cu D. a abusa di e confianza cu e mucha tin den su tata. Fiscal a exigi 6 aña di prison.

ABOGADO

Mr. Edwards a bisa Hues cu D. ta desmenti cu el a tene relacion sexual cu su yiu. D. no ta compronde cu e ex partner ta haci esaki cun’e. E abogado a bisa cu e famianan di e ex partner a yuda pa haci denuncia y percura pa e yiunan di D. sali for di e cas caminda nan ta bibando cu e madastra o sea e casa di D.

E abogado a mustra cu na Venezuela e mucha N. a wordo viola door di familiar. D. ta kere cu ex partner door di jaloersi a bin cu e denuncia aki contra dje pa asina kita su yiunan for di dje cu intension pa hiba nan Hulanda. E yiu muher a bay Colombia cu un gay y actualmente ta na estado. E abogado ta haya cu e ex partner no tabatin e derecho pa parti e videonan pa mas hende mira. El a mustra cu e pañanan cu ta mira riba e promer video no ta mesun cos cu e otro video.

Esey ta mustra cu no ta e mesun muher. D. ta desmenti cu e stem cu ta scucha den e video ta di su yiu. Ariba e videonan no tin ningun indicacion fiho cu ta reconoce e yiu muher di D. E abogado a mustra cu e yiu N. dos biaha a bay KZP pa kita su declaracion pero a wordo menaza cu esey ta wordo considera di duna declaracion falso y lo por haya castigo. E mucha mes ta bisa cu no ta e tabata riba e video. El a bisa cu e tin un piercing na su lombrishi y tin un tattoo na su bariga parti abao. Segun abogado, no ta mira nada di esey riba video.

E mucha a bisa cu el a wordo presiona door di famia di su mama pa declara. Esey a sosode den e combersacion na school caminda e famia tabata presente. Promer N. a desmenti pero ora e famia a bisa cu lo bay Hulanda, el a bisa cu e ta duda y na dado momento el a bisa cu su tata lo a mishi cun’e. Despues e school ta notifica Polis cu e mucha tambe a bisa cu ta e tabata riba e video. Abogado ta haya cu mester duda den e declaracion aki.

Fiscal a reacciona rabia riba e punto cu abogado a bisa cu e mama no tabatin derecho di parti e videonan pa hende mira. Tambe el a mustra cu N. a haci tattoo y piercing despues di e relacion sexual na April 2019.

Hues a sera tratamento di e caso y a bisa cu e ta bay studia e caso y dia 10 Juli 2020 pa 8.15 di mainta tin sentencia.

 

- Advertisement -

DUNA COMENTARIO

Please enter your comment!
Please enter your name here