Home General Kip Hassell a tene un accion pa recauda fondo pa yuda e...

Kip Hassell a tene un accion pa recauda fondo pa yuda e piscadornan Arubianonan encarcela na Venezuela

89
0
SHARE
- Advertisement -

ORANJESTAD (AAN): E conocido Kevin Hassell, mihor conoci como ‘Kip’, ta hopi activo den mundo di deporte di motor na Aruba, unda e ta crea diseñonan unico cu verf riba motorcycle, y tambe riba auto di careda.

   Recien el a mira riba Social Media, un video cu a bin for di un Prison na Venezuela unda por mira e tres Arubianonan deteni bibando den un forma di miseria.

   Manera ta conoci, tabata Diasabra 29 di Februari cu e piscado Paulus ‘Pau’ Martijn di 56 aña a bay scubadive pa tira pisca na Baho.  For di e dia ey e no a wordo mira mas.

   Algun dia despues, actuando riba un posible trip, un trio di amigo na Aruba a subi e boto Isabella y a salu rumbo pa Guajira (Colombia) pa check si por topa cune.  Pa malasuerte e Arubianonan aki cu nan boto a drenta awa teritorial Venezolano, y nan a keda deteni.  E buskeda di Pau Martijn mes a keda cancela.

   E tres Arubianonan ni maske cuanto nan a splica autoridad Venezolano riba nan mision di rescate, toch nan a keda deteni, y traspasa pa un prison pa asina nan warda nan caso presenta dilanti Corte.  Pero e crisis di Coronavirus a pospone tur esaki, y ya nan ta bay cumpli 4 luna encarcela.

   Toch den prison, nan ta permiti pa keda cu smartphone y asina tin comunicacion.  E tres Arubianonan aki tabata depende di placa cu famianan ta manda pa nan, pa asina nan por haya extra cuminda, pasta di diente, etc., den e prison Venezolano.

   Kip Hassell a divulga cu e mes na varios ocasion tabata manda placa pa asina yuda nan haya cuminda, pasobra e prison mes ta duna djis un poco cuminda.

   Pero recien el a caba di mira potret y video, y el a spanta pa mira con flaco algun di nan a bira, y tambe a mira e condicion di e cel den cual nan ta encarcela.

   A base di esey, Kip a dicidi pa haci algo den pura, y a organiza un Accion pa Recauda Fondo.  El a pone algun di su autonan pa show pafo di su garage na Lago Heights mes, a pone musica, y asina a haci suplica pa su amigonan pasa haci donacion.

   Y pueblo a reacciona tambe!  Esey ta loke a haci Kip masha contento mes.  E siman aki mes lo percura pa electronicamente manda e placa recauda pa par di famia cu e presonan aki tin na Venezuela.  Famianan e ora lo percura pa e yudanza yega na e Arubianonan aki unda nan ta encarcela.

   Gobierno di Aruba a indica cu e proceso pa libera e tres yiunan di tera aki a bira un asunto di Reino Hulandes na Den Haag, cu tin di negocia esaki directamente cu Caracas.  Pa colmo como cu ainda no tin fecha pa nan caso presenta den Corte, por lo pronto e trio aki no ta bay sali.

   “Mi a haci mi best, y mi ta contento cu e resultado,” ta loke Kip a declara den un entrevista cu DIARIO.

 

 

- Advertisement -

DUNA COMENTARIO

Please enter your comment!
Please enter your name here