Home General Hulanda mester a impone supervision na 2014

Hulanda mester a impone supervision na 2014

195
0
SHARE
- Advertisement -

Exigencia di Hulanda pa supervision ta duna DIARIO rason

*Coronavirus y eleccion Hulandes ta rementa bom financiero awor

*Tur motibo pa supervision di Reino tabata presente na 2014

ORANJESTAD(AAN)–Loke por a spera basta dia, a tuma luga awor. Hulanda ta pone e exigencia di supervision riba mesa pa Aruba por haya mas espacio financiero den e crisis di e coronavirus nobo.

Por yega na e conclusion cu e dos elementonan cu na hopi ocasion DIARIO a trece dilanti, ta uni pa asina Reino oficialmente por bisa cu Aruba no por carga su autonomia.

Mester analisa loke ta pasa actualmente pa lectornan comprende e materia cu tin riba mesa y na 2014 a wordo ridiculisa ora e Prome Ministro di Aruba e tempo, Mike Eman, a presenta su show di Fort Zoutman.

Pa Aruba por comprende e manipulacion di gobierno anterior, e mester comprende bon pakico Reino ta interveni den situacion financiero di e pais, cu ta base di e bienestar di e pais cu no por haci nada sin placa.

Na 2014 Reino y tur experto cu ta haci uzo di sano huicio mester a conclui cu Aruba no por a carga su autonomia mas y cu Reino mester a lanta para pa cumpli cu e demanda di Statuut cu Reino ta responsabel pa loke pasa cu e ciudadano Hulandes na Aruba tambe.

Na 2014 Aruba tabata den un desastre financiero manera DIARIO a demostra cu cifranan concreto na hopi ocasion. Na 2014 Reino tabata tin motibo legitimo pa bisa gobierno Mike Eman cu ta basta y cu gobierno Mike Eman ta sink Aruba.

E base cu Hulanda tabata tin pa actua ta masha facil.

Un gobernante responsabel no ta pensa mes pa baha BBO, cu ta entrada di e pais cu mita pa e por ta popular. Esaki a pasa na Aruba na 2009 ora Mike Eman a bay presenta su mes como heroe di Aruba ora mundo tabata pasa den un situacion financiero malisimo cu tabata su impacto pa Aruba tambe.

Den un situacion horibel, gobierno Mike Eman a hunga e wega politico di baha entrada di gobierno cu manera cifranan y rapportnan a indica, a destrui e bienestar di Aruba cu a wordo hinca den un mundo di fantasia.

Ta hustamente fantasia di Mike Eman a sigui sink Aruba, cu a wordo atrobe manipula cu e proyecto di Citgo y despues cu e proyectonan di PPS cu tabata desaster total di Aruba.

Na 2014 ya e debe nacional di Aruba, cu ta wordo pusha mas y mas den debe dor di gobierno anterior, tabata imposibel pa Aruba por sostene.

Pues na 2014, Hulanda tabata tin motibo pa actua pero Hulanda a scapa cara di Mike Eman cu su comedia den Fort Zoutman.

Berdad a keda scondi pa Aruba te na momento cu el a rementa na 2017 pero ainda Aruba no por a comprende.

Hulanda a duna Aruba chens ora Aruba mester a cuminsa tuma medida pa paga e debe nacional manera Mike Eman a priminti cu pueblo lo haya cu orguyo.

E coronavirus nobo a topa cu Aruba den un desastre financiero y economico a base di e abuso gubernamental di gobierno Mike Eman, cu awe mester tin berguensa.

Hulanda awe den porta di eleccionnan y cu gastonan enorme di e pais mes dor di e coronavirus nobo, mester hunga duro contra Aruba.

Si na 2014 Hulanda a actua manera e mester a actua, Aruba lo a conoce cambio. A scapa cara di gobierno anterior sin comprende cu ningun hende por mira destino.

Ni Hulanda ni Aruba por a mira cu lo bini un coronavirus nobo pa Aruba na 2020.

Awe e supervision Hulandes cu mester a wordo introduci for di 2014, lo wordo introduci. Hulanda mes no tin placa mas y Hulanda mes a bisa cu Aruba no por carga su autonomia.

Hulanda no por permiti Aruba sink financieramente y awe ta actua despues di un tardanza di seis aña, pues for di 2014 ora un show den Fort Zoutman no a bira welga di hamber actual di pueblo pero hamber pa pueblo di Aruba cu ta sink den e olanan bruto di debe nacional, proyectonan PPS, abuso di placa di pueblo di Aruba y finalmente e coronavirus nobo.

 

 



 

- Advertisement -

DUNA COMENTARIO

Please enter your comment!
Please enter your name here