Home Gobierno Gobierno ta djis pidi 3 cos di pueblo pa evita cu virus...

Gobierno ta djis pidi 3 cos di pueblo pa evita cu virus plama bek

459
0
SHARE
- Advertisement -

ORANJESTAD (AAN): Prome Minister Evelyn Wever-Croes, Minister Dangui Oduber y Sra Ronella Tijn Asjoe-Croes, CEO ATA durante e conferencia di prensa di Gobierno di Aruba diaranson anochi a enfoca riba e preparacionnan cu a y ta tumando luga pa e siguiente fase cu nos ta bay drenta aden, esta apertura di fronteranan.

    Prome Minister a enfatisa cu den e normal nobo, Gobierno di Aruba ta haci tur esfuerso pa nos comunidad ta sigur y ta pidi tres cos di cada un di nos.

   “Nos tabata prepara caba ora e crisis a dal nos dia 13 di Maart y nos tabata tin un strategia di test agresivo y tabata tin tur cos in place pa asina nos a evita cu e virus a sigui plama. Aworaki nos ta miho prepara pa e siguiente parti cu ta bin nos dilanti. Practicamente casi tur sector di nos economia ta habri, tur hende tin e movecion liber riba nos pais, nos tin mas di un luna cu nos ta Covid-19 free pues nos ta prepara pe siguiente fase cu ta habri nos frontera.

   Manera Minister Dangui a bisa, nos a tuma na cuenta tur e recomendacionnan cu nos a haya di instancianan y nos ta cla pa bay na normalidad back. Mi ta ripiti nos no ta bay nunca mas na e normalidad back sino na e normalidad nobo. Den e normalidad nobo nos ta haciendo tur di nos parti pa abo ta sigur pero di bo nos mester di tres cos.

   E prome ta pa bo atene bo mes na e regla di distanciamento, no yega cerca di hende, ni brasa, sunchi of duna man. Tene distancia pasobra bo no sa si e por tin e virus y si bo ta cerca lo bo por haya hopi facil e infeccion of virus.

   E di dos ta pa bo mantene e reglanan di hygiena. Laba man frecuentemente of uza handsanitizer. E metodo aki a prueba di ta sumamente efectivo pasobra ultimo lunanan mayoria di nos masha poco a bira malo.

   E di tres ta si bo tin un sintoma porfabor yama bo dokter di cas pa bo haci un cita pa haci e test. Asina nos por detecta na tempo si bo tin e virus pa asina por isola e virus y evita cu e ta plama.

   Esaki ta e tres cosnan cu nos ta pidi dibo pa drenta e siguiente fase cu ta bay habri otro siman”, Prome Minister a termina ta bisa.

 

- Advertisement -

DUNA COMENTARIO

Please enter your comment!
Please enter your name here